Qarabağdan çıxan Rusiya bu ərazidə yeni hərbi baza yaradır - DETALLAR

Rusiya Abxaziyada hərbi donanması üçün yeni baza yaradacaq.

Publika.az xəbər verir ki, bu iddia ilə Gürcüstan prezidenti Salome Zurabişvili çıxış edib.

Tbilisidə mətbuat konfransı keçirən Zurabişvili bildirib ki, Rusiyanın Abxaziyada yaradacağı hərbi bazanın inşa işləri başlanıb.

“Oçamçire bazası üçün işlərə start verilib. Bu ciddi problemdir və təkcə Gürcüstan üçün yox, Qara dəniz üçün də təhlükəlidir”, - Zurabaşvili bildirib.

Qeyd edək ki, Rusiyanın Abxaziyada hərbi baza inşa etmək planı haqda məlumatlar daha öncə də yayılmışdı, xüsusilə sülhməramlıların Qarabağdan çıxdıqdan sonra bu iddialar intensivləşdi. Abxaziyada yaradılacaq hərbi bazanın iki məqsədi ola bilər.

Birincisi, Ukrayna müharibəsində hərbi donanması ciddi zərər görən Rusiya dəniz qüvvələri üçün yeni təhlükəsiz “liman” hazırlayır.

İkincisi, Rusiyanın Abxaziyada hərbi baza inşa etmək planı Cənubi Qafqazda zəifləyən mövqelərini qorumaq məqsədi daşıyır. Sülhməramlılar Qarabağdan çıxdıqdan sonra Rusiyanın bölgədə yeni hərbi baza yaradacağı gözləntiləri vardı. Mümkündür ki, yeni baza məhz Abxaziyada yaradılacaq. Bu baza həm də Rusiyanın Ermənistanda zəifləyən təsir imkanlarının bölgədə kompensasiya edilməsinə hesablanıb.

Asif