Qərbin əsas müttəfiqi Rusiyanın təzyiqi altında çökür - WSJ

Son aylarda Rusiyanın Ukraynada səylərini gücləndirdiyi bir vaxtda Gürcüstan hökuməti də çoxdankı qərbyönümlü istəklərindən uzaqlaşaraq Moskvaya yaxınlaşıb.

Publika.az xəbər verir ki, bu barədə “The Wall Street Journal”-da dərc olunan məqalədə deyilir.

Qeyd edilib ki, oktyabr ayına planlaşdırılan milli seçkilər bütün region üçün əsas meyar və mümkün dönüşə çevrilir.

Gürcüstan bir vaxtlar yaxşı idarəetmənin tətbiqində qabaqcıl ölkə kimi qiymətləndirilib, keçmiş Sovet İttifaqının ən qərbyönlü hissələrindən biri hesab edilib və rəy sorğuları onun hələ də böyük əksəriyyətinin Aİ və NATO-ya qoşulmağın tərəfdarı olduğunu göstərir.

“Gürcüstanın Qərbdən qopması üçün katalizator bu ilin yayında müxalifət tərəfindən “Rusiya qanunu” adlandırılan qeyri-hökumət təşkilatları, media və vətəndaş cəmiyyəti üçün xaricdən maliyyələşməyə sərt məhdudiyyətlər tətbiq etməsi oldu. Bundan əlavə, Rusiyadan nümunə götürən Gürcüstan hökuməti indi LGBT-nin təbliğatını qadağan edən və ənənəvi dəyərləri dəstəkləyən qanunu təbliğ edir”, - WSJ qeyd edir.

Gürcüstanın keçmiş prezidenti Giorgi Marqvelaşvilinin qeyd etdiyi kimi, ölkədə siyasi fikir ayrılıqları olsa da, bütün hökumətlər açıq şəkildə qərbyönlü idi.

“İndi ilk dəfədir ki, hökumət millətin geosiyasi oriyentasiyasını dəyişir. Rusiya üçün ideoloji baxımdan bu, böyük qələbədir”, - o əlavə edib.

Eyni zamanda, hakim “Gürcü arzusu” partiyası Qərbin və müxalifətin Gürcüstanın Ukraynadakı müharibədə Rusiyanın tərəfində olması ilə bağlı ittihamlarını rədd edir.

Akqabay