Gürcüstan Prezidentini həbs gözləyir - Özü detalları AÇIQLADI

Gürcüstan Prezidenti Salome Zurabişvili hakim Gürcü Arzusu - Demokratik Gürcüstan Partiyasının oktyabrın 26-da keçiriləcək parlament seçkilərində qalib gələcəyi təqdirdə impiçment və hətta həbslə üzləşə biləcəyini deyib.

Publika.az xəbər verir ki, bu barədə TASS məlumat yayıb.

"Bu baş verərsə, yəqin ki, impiçment elan edilib həbsxanaya göndəriləcəyəm", - Zurabişvili mətbuat konfransında hakim partiyanın müxalifətə qadağa qoymaq etmək və mühakimə etmək üçün mümkün hərəkətlərini şərh edərkən bildirib.

Eyni zamanda, o, müxalifət qüvvələrinin məğlubiyyətinin mümkünlüyünü müzakirə etmək istəmədiyini vurğulayıb. Onun sözlərinə görə, vətəndaşlar seçkilərdə fəal olsalar, müxalifət partiyaları birləşib koalisiya hökuməti yarada bilərlər.

Gürcüstanda parlament seçkiləri oktyabrın 26-da keçiriləcək. Hakim partiya dəfələrlə təkcə qalib gəlmək deyil, həm də konstitusiya çoxluğu əldə etmək niyyətini bəyan edib ki, bu da eks-prezident Mixail Saakaşvilinin Vahid Milli Hərəkat partiyasını və digər əsas müxalifət qüvvələrini konstitusiyaya zidd kimi tanımağa imkan verəcək.

"Gürcü Arzusu" həmçinin 2012-ci ilə qədər Saakaşvilinin hakimiyyəti dövründə müxalifət nümayəndələrini məsuliyyətə cəlb etmək niyyətindədir.

Prezident həmçinin bəyan edib ki, Qərb tərəfdaşlarından heç biri Gürcüstandan Rusiyaya qarşı ikinci cəbhə açmağı tələb etmir.

Hüseyn İbadlı