Gürcüstan yenidən QARIŞDI - Ölkənin iri şəhərlərində...

Tbilisidə Gürcüstan parlamentinin binası yaxınlığında, eləcə də ölkənin iri şəhərlərində - Batumi, Zuqdidi və Kutaisidə yeni hökumət əleyhinə etirazlar keçirilir.

Publika.az xəbər verir ki, bu barədə "RİA Novosti" məlumat yayıb.

Tbilisidə keçirilən aksiyada bir neçə yüz nəfər iştirak edib. Agentlik qeyd edib ki, nümayişçilər yeni seçkilərin keçirilməsini və mitinqlər zamanı saxlanılan şəxslərin azad edilməsini tələb edirlər. Parlamentin qarşısındakı mərkəzi Rustaveli prospekti nəqliyyat vasitələrinin hərəkəti üçün bağlanıb.

Gürcüstanda ilk etiraz dalğası ötən il oktyabrın 26-da hakim “Gürcü arzusu” partiyasının qalib gəldiyi parlament seçkilərindən sonra başlayıb. Partiya, parlamentdəki 150 yerdən 89-unu alıb, bir sıra müxalifət siyasi birlikləri seçkinin nəticələrini tanımayıb, “Dəyişiklik Koalisiyası”nın üzvləri isə hətta deputat mandatlarından imtina ediblər.

2024-cü il noyabrın 28-dən Tbilisidə və Gürcüstanın digər şəhərlərində hakimiyyət ölkənin Avropa İttifaqına daxil olması ilə bağlı danışıqların 2028-ci ilə qədər dayandırıldığını elan etdikdən sonra etirazların ikinci dalğası baş verib.

Yanvarın 20-də Gürcüstanın baş naziri İrakli Kobaxidze bildirib ki, 2025-ci ildə Gürcüstanda radikal qüvvələrə həlledici zərbə vurmaq və “liberal faşizmə” son qoymaq lazımdır. Nazirlər Kabinetinin rəhbərinin fikrincə, bu, ölkəni inkişaf etdirməyə və milli məqsədlərə nail olmağa imkan verəcək.

Hüseyn İbadlı