“Sülh razılaşması bu problemi həll etdi” - Paşinyan nədən danışır?

"Biz sülh sazişinin imzalanma vaxtı və yeri ilə bağlı məsləhətləşmələrə başlamağa hazır olduğumuzu bildirdik. Azərbaycanın öz ideyaları, öz sualları var. Qiymətləndirməmiz ondan ibarətdir ki, bütün bu məsələlər sülh sazişinin mətnində öz əksini tapıb və biz bundan sonra mövqelərimizi aydınlaşdırmağa çalışacağıq".

Publika.az xəbər verir ki, bunu Ermənistanın Baş naziri Nikol Paşinyan Mülki Müqavilə Partiyasının ofisində jurnalistlərlə söhbətində deyib.

O, Ermənistanın Azərbaycanla Konstitusiyaya dəyişikliklə bağlı müzakirələr aparıb-aparmaması ilə bağlı sualı da cavablandırıb.

"Xeyr. Belə bir müzakirə yoxdur. Konstitusiya Məhkəməsinin ötənilki qərarından sonra məlum olur ki, ER Konstitusiyasında nə Azərbaycana, nə də başqa ölkəyə qarşı ərazi iddiaları yoxdur.

Lakin bütün bu mümkün qavrayışlarla indi yeni bir reallıq var. Bu, sülh sazişinin razılaşdırılmış mətninin mövcudluğudur. Bu mətn bütün bu problemləri həll edir. Çalışacağıq ki, qarşıdakı müzakirələrdə bu məsələ ilə bağlı Azərbaycanla danışaq və onların mövqeyinin məntiqinin nədən ibarət olduğunu görək.

Sülh müqaviləsinin ən azı üç maddəsi bu məsələlərə toxunur və onlar öz həllini tapıb", - deyə o bildirib.

Konstitusiyaya dəyişikliklə bağlı məsələnin hələ danışıqlar masasında müzakirə olunmadığını nəzərdə tutub-tutmaması ilə bağlı aydınlaşdırıcı suala cavab olaraq Paşinyan deyib:

“Onlar öz mövqeyini bildirdilər, biz də bildirdik ki, biz daxili məsələlərimizi müzakirə etmirik”.

Hüseyn İbadlı