Ərdoğan Gürcüstana rəsmi səfərə dəvət edildi - FOTO

Baş nazir İrakli Kobaxidze Türkiyə prezidenti Rəcəb Tayyib Ərdoğanla görüşüb.

Publika.az xəbər verir ki, bu barədə Gürcüstan hökuməti məlumat yayıb.

Antalya Diplomatiya Forumu çərçivəsində keçirilən görüşdə iki ölkə arasında strateji tərəfdaşlığın yüksək səviyyəsindən və müxtəlif sahələrdə uğurlu əməkdaşlıqdan danışılıb.

Baş nazir qonaqpərvərliyinə görə Prezident Ərdoğana təşəkkür edib və forumun liderlər arasında müxtəlif məsələlərlə bağlı fikir mübadiləsi üçün mühüm platformaya çevrildiyini qeyd edib.

Tərəflər Birgə İqtisadi Komitənin işinin bərpasının vacibliyini müzakirə edib və yaxın vaxtlarda növbəti iclasın keçirməyə hazır olduqlarını təsdiqləyiblər. Türkiyənin Gürcüstanın ən böyük ticarət tərəfdaşı olduğu qeyd edilib və 2025-ci ildə ikitərəfli ticarət dövriyyəsinin 5 milyard dollara çatacağına ümid ifadə olunub.

Görüşdə Yaxın Şərqdə baş verən hadisələr və Cənubi Qafqazda sülh və sabitliyin xüsusi əhəmiyyəti müzakirə olunub. Baş nazir Gürcüstanın regionda etimadın və davamlı sülhün bərpasını təmin edəcək dialoqu təşviq etməyə hazır olduğunu təsdiqləyib.

Görüşdə, həmçinin, növbəti nazirlərin Türkiyədə keçiriləcək Gürcüstan-Türkiyə-Azərbaycan üçtərəfli formatının əhəmiyyəti müzakirə olunub.

Görüşün sonunda İrakli Kobaxidze Rəcəb Tayyib Ərdoğanı Gürcüstana rəsmi səfərə dəvət edib.

Hüseyn İbadlı