Ermənistanda həbslər davam edir: Şirak Yeparxiyasının rəhbəri də saxlanıldı

Erməni Apostol Kilsəsinin Şirak Yeparxiyasının rəhbəri, arxiyepiskop Mikael Ajapaxyan İrəvan birinci instansiyasının hakimi Masis Melkonyanın qərarı ilə həbs edilib.

Publika.az xəbər verir ki, həbs iyunun 27-də axşam saatlarında olub.

Vəkil Ara Zohrabyanın jurnalistlərə verdiyi məlumata görə, Mikael Ajapaqyan iki aylıq həbs olunub. Lakin müdafiə tərəfi apellyasiya şikayəti vermək niyyətindədir. İlkin məlumata görə, Şirak yeparxiyasının rəhbəri Nubaraşen cəzaçəkmə müəssisəsinə köçürüləcək.

Ajapaxyan açıq şəkildə hökumətin devrilməsinə çağırışda ittiham olunur, lakin o, özü ittihamları uydurma adlandırıb.

Ermənistan hakimiyyəti ilə Erməni Apostol Kilsəsi arasında qarşıdurma baş nazir Nikol Paşinyanın sosial şəbəkələrdə kilsə haqqında sərt ifadələr, o cümlədən kobud ifadələr işlətdiyi paylaşımlarından sonra kəskinləşib. Daha sonra o, bütün ermənilərin katolikosunun seçilməsi prosedurunun dəyişdirilməsini təklif edərək, bu prosesdə dövlətin həlledici rol oynayacağını irəli sürüb.