Cənubi Qafqaz

Ermənistana yeni konstitusiya lazımdır - Paşinyan

5 İyul 2025 17:47

Ermənistanın yeni konstitusiyaya ehtiyacı var.

Publika.az xəbər verir ki, bunu Ermənistanın baş naziri Nikol Paşinyan Konstitusiya Günü münasibətilə çıxışında deyib.

Bundan əvvəl Ermənistanın ədliyyə naziri Srbuhi Qalyan bildirmişdi ki, konstitusiyanın yeni mətni 10 ay ərzində hazır ola bilər, lakin müddət müzakirələrin gedişindən asılıdır. O əlavə edib ki, Konstitusiya İslahatları Şurasının uzun müddətdən sonra ilk iclası iki həftədən sonra keçiriləcək.

"Ermənistana ümumxalq səsverməsi ilə təsdiq edilmiş yeni konstitusiya lazımdır. Xalqın özününkü hesab edəcəyi konstitusiya", - o, konstitusiyanın qəbulunun 30-cu ildönümü ilə bağlı keçirilən təntənəli tədbirdə deyib.

Paşinyan qeyd edib ki, Ermənistanda son 35 ildə qurulan hüquqi nizam hələ də xalq tərəfindən onların iştirakı olmadan qəbul edilmiş bir şey kimi qəbul edilir.

Baş nazirin sözlərinə görə, Ermənistanın yeni konstitusiyaya ehtiyacı var və bu konstitusiya ölkənin bu gün mövcud olduğu reallığı əks etdirən konkret məqsəd daşımalıdır.

Qeyd edək ki, Ermənistanın hazırkı Konstitusiyası 1995-ci ildə qəbul edilib və 2005 və 2015-ci illərdə islahat edilib. 2015-ci ildə edilən dəyişikliklərdən sonra ölkə yarımprezident üsul-idarəsindən parlament idarəetmə formasına keçib.

Akqabay