Cənubi Qafqaz

Paşinyan Makronla danışdı: Bakı-İrəvan razılaşması ilə bağlı bunları dedi

11 Avqust 2025 16:44

Ermənistanın baş naziri Nikol Paşinyan Vaşinqtonda imzalanmış Azərbaycan-Ermənistan-ABŞ bəyannaməsinin təfərrüatI barədə Fransa prezidenti Emmanuel Makronu telefonla məlumatlandırıb.

Publika.az xəbər verir ki, bu barədə Ermənistan Nazirlər Kabinetinin mətbuat xidməti məlumat yayıb.

“Baş nazir avqustun 8-də Vaşinqtonda keçirilən danışıqların nəticələrini Fransa prezidentinə təqdim edərək, xüsusilə “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis olunması haqqında Saziş”in paraflanması, ATƏT-in Minsk qrupunun mexanizmlərinin buraxılması ilə bağlı ATƏT-ə birgə müraciət, ölkələrin ərazi bütövlüyü, suverenliyi və yurisdiksiyası prinsipləri çərçivəsində regional kommunikasiyaların açılması, eləcə də Beynəlxalq Sülh və Rifah naminə Tramp Marşrutu (TRIPP) layihəsi barədə məlumat verib”, - bəyanatda qeyd olunub.

Paşinyan vurğulayıb ki, sülhün bərqərar olması Ermənistanda və regionda yeni investisiya imkanları açır.

Həmsöhbətlər ikitərəfli və beynəlxalq gündəmlər üzrə fəal siyasi dialoqu davam etdirməyə qarşılıqlı hazır olduqlarını bildiriblər.

Ermənistanın baş naziri davamlı dəstəyə görə Fransa prezidentinə təşəkkür edib.

Öz növbəsində Makron "X" sosial şəbəkəsində söhbət zamanı bəyannamənin imzalanmasını alqışladığını vurğulayıb.

"Ümid edirəm ki, bu bəyannamə tezliklə hər bir tərəfin maraqlarını nəzərə alan sülh müqaviləsinin imzalanmasına və ratifikasiyasına gətirib çıxaracaq”, - Fransa prezidenti qeyd edib.

Akqabay