Ölkədə olmayan Paşinyanı devirmək üçün hərəkətə keçdilər - DETALLAR

Rusiyaya səfəri bitən Ermənistanın baş naziri Nikol Paşinyan Moskvadan birbaşa Nyu-Yorka uçub. Erməni baş nazirin BMT Baş Assambleyasının 80-ci sessiyasında iştirak edəcəyi gözlənilir.

Publika.az xəbər verir ki, Paşinyan ölkədə olmadığı vaxt Ermənistanda onun impiçment olunması məsələsi müzakirəyə çıxarılıb.

“Daşnaksütyun” partiyasının nümayəndəsi, “Ermənistan” blokundan olan deputat İşxan Saqatelyan impiçment prosesinin başlanması üçün blokun deputatlarının imzaladığı blankı “Şərəfim var” fraksiyasından olan həmkarlarına təqdim edib.

İmpiçment təşəbbüsü Serj Sarkisyanın rəhbəri olduğu “Şərəfim var” fraksiyası tərəfindən irəli sürülüb. Robert Koçaryanın lideri olduğu “Ermənistan” boloku müəyyən fikir ayrılığına baxmayaraq, prosesə qoşulur. Saqatelyan bildirib ki, onlar əvvəldən bu təşəbbüsü dəstəkləyiblər, lakin səs çoxluğunun olmaması təşəbbüsün praktiki icrasını çətinləşdirir. O, təmsil etdiyi blokun deputatlarının imzaladığı blankı “Şərəfim var” fraksiyasına təqdim etməklə, onları dəstəklədiklərini ifadə edib.

Ermənistan müxalifəti hakim “Mülki müqavilə” partiyasının deputatlarının da impiçment prosesinə qoşulması istiqamətində səylərini artıracağını bəyan edib.

Qeyd edək ki, impiçment prosesinə başlamaq üçün parlament üzvlərinin 36-sı, prosesi uğurla yekunlaşdırmaq üçün isə 107 deputatdan minumum 54-nün dəstəkləməsi lazımdır. “Ermənistan” blokunun 28, “Şərəfim var” blokunun isə 6 deputat yeri var. Müxalifət Paşinyana qarşı impiçment prosesinin başlanmasına belə nail ola bilmir. Buna görə hakim komandanın üzvlərinin cəlb edilməsi uğrunda mübarizə gedir.

Asif