Dünya

Putin və Ərdoğan üçün 200-dən çox jurnalist toplandı

9 Avqust 2016 15:30

Ötən ilin noyabrında rəsmi Ankara ilə Moskva arasında yaşanan təyyarə böhranından sonra bu gün Sankt-Peterburqda Türkiyə və Rusiya prezidentləri – Rəcəb Tayyib Ərdoğan ilə Vladimir Putin arasında tarix görüş keçirilib.

Publika.az xarici mediaya istinadən xəbər verir ki, görüş Sankt-Peterburqun Konstantinov sarayında baş tutub.

Görüşü işıqlandırmaq üçün aralarında Avropa, ABŞ, Yaxın Şərq, Çin və Yaponiyadan olan 200-dən çox media nümayəndəsi Sankt-Peterburqa toplanıb.

“Interfax” informasiya agentliyinin məlumatına görə, Ərdoğan və Medvedev arasında keçirilən görüş “dar formatda” təşkil olunub. Yəni, görüşdə Rusiya tərəfindən xarici işlər naziri Sergey Lavrov, prezident Vladimir Putinin köməkçisi Yuriy Uşakov, Türkiyə tərəfindən isə xarici işlər naziri Mevlüt Çavuşoğlu və prezident R.T.Ərdoğanın köməkçisi İbrahim Kalın iştirak edirlər.

Daha sonra geniş tərkibli görüşün keçirilməsi gözlənilir.

Vasif Həsənli