Etirazçılar Paşinyanın yerinə kimi gətirir? - Baqrat açıqladı

12:07

“Bizim addımlarımızın ardıcıllığı xalqın iradəsi ilə baş tutdu. Demarkasiya prosesinin dayandırılması barədə danışmağı planlaşdırırdıq”.

Publika.az xəbər verir ki, bunu mayın 10-da İrəvanın Respublika meydanında jurnalistlərlə söhbətində Erməni Apostol Kilsəsinin Tavuş yeparxiyasının primatı, arxiyepiskop Baqrat Qalstanyan deyib.

“Amma xalqın tələbi belə idi və mən başqa heç nə danışa bilməzdim. Mən sadəcə olaraq xalqın tələbini səsləndirdim və formalaşdırdım. Bu hərəkat bizim üçün çox vacibdir. Daha irəli gedə bilməyəcəyimiz kritik həddə çatdıq. Parçalanmış, təminatsız, heç bir daxili və xarici təhlükəsizliyi olmayan ölkəmiz sadəcə bir torpaq parçasına, əraziyə çevriləcək. İnsanların burada yaşamaq istəyəcəyini düşünmürəm. Söhbət indiki mərhələdə fəlakətin qarşısının alınmasından gedir. Baş verənlərə görə bütün məsuliyyət səlahiyyətlilərin üzərinə düşür. Onlar dağılma prosesini dayandırmaq üçün bütün vasitələrə əl atmalıdırlar. Ona görə də bu insanlar getməlidirlər”, - Qalstanyan bildirib.

“Baş nazir postunda kimi görürsünüz” sualına arxiyepiskop belə cavab verib: “Bizim işimiz indiyədək siyasi proses olmayıb. İndi, fikrimizcə, hər şey siyasi xadimlərin məsləhətləşmələrinin nəticələrinə əsasən planlaşdırılmalıdır. Dünən parlament üzvləri ilə görüşməyə çalışdıq ki, proseslər necə gedə bilər. Onlar prosesi davam etdirməyə hazırdırlar və qanuni yolla başa çatdırmağa çalışırlar. O zaman baş nazirliyə namizəd lazım olacaq. Yəqin ki, bundan sonra hər şey açıqlanacaq.

Adlar təbii olaraq müzakirə olunur, müxtəlif adlar müzakirə olunur. İndi xalqın oyanış mərhələsidir. Bu gün, sabah, o biri gün əməli addımlar günüdür”.

Keşiş vurğulayıb ki, baş nazirin adı ilə bağlı hələ də razılıq yoxdur. “Parlamentdə fraksiyalar müzakirə edəcək, müəyyən məsləhətləşmələr aparılacaq, bütün siyasi meydan bu şəxsin ətrafında birləşəcək və onun kim olduğu açıqlanacaq”, - deyən Baqrat əlavə edib ki, parlamentdə yalnız iki müxalifət fraksiyası ilə müzakirələr aparılır. Hakim Mülki Müqavilə partiyası ilə bu günə qədər heç bir əlaqə yoxdur.

Tural