• USD 1,7430 0,00% EUR 1,8487 0,00%
    • GBP 2,1929 0,00% RUB 0,0275 0,00%

"Bakupost"un Elnur Aslanovla əlaqəsi yoxdur - baş redaktor

"Bakupost"un Elnur Aslanovla əlaqəsi yoxdur - baş redaktor

Prezidenti Administrasiyasının Siyasi təhlil və informasiya təminatı şöbəsinin keçmiş müdiri Elnur Aslanovun vəzifədən azad edilməsindən sonra bir sıra mətbuat orqanlarının fəaliyyətində ixtisarlar müşahidə olundu, bəziləri isə fəaliyyətini dayandırdı.

Adıçəkilən şöbə ilə əlaqədə adı hallandırılan media qurumlarından əvvəl əhaliyə pulsuz paylanan “New Baku Post” qəzetidir. Hazırda qəzet kağız nəşrini dayandıraraq onlayn versiyada "Bakupost.az" adı ilə fəaliyyət göstərir.

Bu media qurumunun baş redaktoru Tofiq Abbasov rəhbərlik etdiyi qəzetin fəaliyyətinin E.Aslanovla əlaqələndirməsi və ixtisarların olması ilə bağlı yayılan fikirlərə aydınlıq gətirib. Onun sözlərinə görə, qəzet biznes layihəsi olub və indi də bu istiqamətdə çalışır.

- “Nyu Baku Post” biznes layihəsidir, bunu Kənan Quluzadə və Tural Əliyevlə birlikdə reallaşdırmışdıq. Bu, Kənan Quluzadə ilə mənim ideyamız idi, lakin bəzi ideoloji məsələlərdə məsləhətləşmələr keçirib, müəyyən məsələlərin həllində kənardan dəstək istəmişdik ki, bu bizə verildi. Amma bunun Prezidenti Administrasiyasının Siyasi təhlil və informasiya təminatı şöbəsinin keçmiş müdiri Elnur Aslanovla əlaqələndirilməsi boş fikirlərdir və buna önəm vermirəm. E.Aslanovla şəxsi tanışlığım olub, fikir mübadiləsi aparmışıq, onu Azərbaycanın dəyərli oğlu kimi tanıyıram. Qəzetin fəaliyyətini kiminləsə bağlamaq düzgün deyil. Qəzetin kiminlə əlaqəsindən yazmaqdansa, fəaliyyətimizdəki yenilikləri işıqlandırsınlar. Bu xəbərlərə heç vaxt şərh vermirəm, öz işimlə məşğulam.

- Dediniz Elnur Aslanovla məsələhətləşmələr olub. Bu məsləhətlərin qəzetin istiqamətinə təsiri olubmu?

-Yeni bir layihəyə başlayanda bir çox dost-tanışla, eyni zamanda, E.Aslanovla məsləhətləşmələr aparmışam. Fəaliyyətə başladıqdan sonra da bu cür fikir mübadiləsi olub. Onların fikri mənim üçün dəyərli olub. Çünki işimiz elədir ki, bir nəfərin zövqü yox, kollektiv düşüncə məhsulu olmalıdır.

- Kağız formada yayım özünü doğrultdumu?

- Bütün redakasiya kollektivi deyə bilər ki, məqsədimizə çatdıq. Bəzən bayramlarla əlaqədar olaraq qəzetin çapında gecikmələr olurdu, o zaman oxucular əlaqə saxlayırdılar. Bu da qəzetin tələbləri doğrultduğunu göstərdi. Bundan başqa, tələbələrdən ibarət könüllülər qrupumuz var idi ki, monitorinq aparırdı. Qəzetlə bağlı təklifləri bizə çatdırırdılar.

- Artıq kağız yox, onlayn formada fəaliyyət göstərirsiz. Kağız formatına maraq yüksək idisə, nə üçün onlayn varianta keçildi?

- Zamanın tələbinə uyğun olaraq onlayn formaya keçdik. Ölkədə saytlar, portallar var idi, amma ilk onlayn-qəzeti biz yaratdıq. Ötən ilin sonunda kağız qəzetdən onlayn qəzet formasına keçdik. Bu qərar Kənan Quluzadə ilə mənim, eyni zamanda, bütün redaksiya heyətinin ortaq fikri oldu. Zamanla çətinlikləri aradan qaldırırıq. Amma bu qərarın da verilməsinin əsaslı səbəbi var idi. 2012-ci ildə fəaliyyətə başlayanda 2013-cü il prezident seçkiləri və nəticədə ictimai-siyasi həyatda canlanma olacağını nəzərə almışdıq. Məhz həmin vaxtda siyasi partiyaların fəaliyyətində çeviklik və reklam bazarında canlanma var idi. Bunlardan istifadə edib, reklam fəaliyyətimizi genişləndirdik. Məqsədlərimizə çatdıqdan sonra, 2014-cü ilin əvvəlindən artıq onlayn formaya keçdik.

- Onlayn qəzet kağız formasındakı kimi maraq yaratdımı?

- İlk keçdiyimiz vaxtda oxucuların sayında azalma oldu, fevralın ilk günlərində onların sayı3 min idi. Amma indi oxucuların sayı 10 mindən çoxdur, bəzi günlər 25 min izləyici olur. Bunun daha da artmasına çalışırıq. Oxucu qıtlığından şikayətlənmirəm. Amma, eyni zamanda, oxucu marağı yaratmaq üçün yeniliklər etməyə çalışırıq.

-Kollektivdə dəyişikliklər oldumu?

- Fəaliyyətimiz dövründə kollektivdə 2-3 dəfə dəyişiklik oldu, onlayn formaya keçəndən sonra da bu hal baş verdi. Lakin bu dəyişikliyi Elnur Aslanovla əlaqələndirmək, ixtisarlar kimi dəyərləndirmək düzgün deyil.

Hazırkı kollektivimiz çevikdir, gənclər çoxdur. Bəzi novator ideyaları reallaşdırırıq, yazılarımızda Rusiya, Ukrayna, Gürcüstanın ekspertlərindən fikirlər öyrənirik.

- Televiziya jurnalisti olmusunuz, yenidən bu sahəyə qayıtmaq planlarınızda varmı?

- Televiziya fəaliyyətimin əsas hissəsini təşkil edir, televiziya ilə böyümüşəm. Yenidən qayıtmaq üçün təkliflər olmalıdır. 2013-ci ildə belə bir təklif oldu, televiziyada rəhbər vəzifə idi. Həmin vaxtda qəzetlə bağlı planlarım olduğuna görə təklifi qəbul etmədim. İndiki durumda yenidən belə bir təklif olarsa, qiymətləndirə bilərəm, amma təklifdə təklif olmalıdır.

Gülxar

Xəbər lenti

DAHA ÇOX XƏBƏR