Baş verə biləcək fövqəladə hadisələrin qarşısı vaxtında alınmalıdır

Fövqəladə Hallar Nazirliyinin (FHN) Muğan Regional Mərkəzi Neftçala şəhər 4 nömrəli orta məktəbdə “Baş verə biləcək fövqəladə hadisələrin qarşısının vaxtında alınması” mövzusunda maarifləndirmə tədbiri keçirib.

FHN-dən Publika.az-a bildiriblər ki, tədbirin keçirilməsində məqsəd məktəbin müəllim və şagird heyətinə fövqəladə hallar zamanı davranış qaydaları, baş verə biləcək yanğın, partlayış və digər fövqəladə hadisələrin qarşısının vaxtında alınması və profilaktik tədbirlərin görülməsi barədə biliklərin aşılanması olub.

Tədbirdə çıxış edənlər fövqəladə hallar baş verən zaman nə etməli, dəm qazından zəhərlənmənin qarşısının alınması, yanğın təhlükəsizliyi, ilkin yanğınsöndürmə vasitələri, zəlzələ və daşqın mövzularında məlumatlar veriblər.

Novruz bayramı ilə əlaqədar olaraq bayram günlərində yanğın təhlükəsi ilə bağlı bir sıra təhlükəsizlik qaydaları izah edilib.

Sonra Fövqəladə Hallar Nazirliyinin fəaliyyətindən bəhs edən videoçarx nümayiş olunub, müəllim və şagirdləri maraqlandıran suallar cavablandırılıb.