Nazirlikdən korrupsiyada ittiham olunan keçmiş əməkdaşı barədə AÇIQLAMA

Kənd Təsərrüfatı Nazirliyi barəsində cinayət işi başlanan nazirlik əməkdaşı ilə bağlı məlumat yayıb.

Nazirliyin mətbuat xidmətindən Publika.az-a verilən məlumata görə, Dövlət Maşın Sınaq Stansiyasının direktoru Cavanşir Bağırov işində yol verdiyi nöqsanlara görə 2014-cü ildə vəzifəsindən azad olunub, hazırda KTN sistemində işləmir.

Baş Prokurorluğun yaydığı məlumata görə, KTN-in Dövlət Maşın Sınaq Stansiyasının direktoru Cavanşir Bağırov və digər vəzifəli şəxslərin vəzifə səlahiyyətlərindən sui-istifadə edərək rəsmi sənədlərə bilə-bilə yalan məlumatlar daxil etməklə vəzifə saxtakarlığı etmələrində, bundan başqa müəssisədə faktiki işləməyən şəxslərin adlarına əmək haqqları yazılması, tariflərin düzgün tətbiq edilməməsi və saxta qaimələrin tərtib edilməsi yolu ilə 221 min manat məbləğində pul vəsaitlərini mənimsəyərək israf etməklə dövlətin qanunla qorunan mənafeyinə mühüm zərər vurmalarında şübhələr üçün əsaslar olduğundan fakta görə Cinayət Məcəlləsinin 179.3.2 (külli miqdarda mənimsəmə və ya israf etmə), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb.

Hazırda cinayət işi üzrə istintaq tədbirləri davam etdirilir.

Gülxar