Baydendən ÇAĞIRIŞ: 4 il əvvəl baş verənlər təkrarlanmamalıdır

ABŞ prezidenti Co Bayden 2020-ci il prezident seçkilərindən sonra 6 yanvar 2021-ci ildə baş verən Konqres basqınının 4-cü ildönümü ilə bağlı “Washington Post” qəzetində dərc olunan məqaləsində oxşar hadisənin təkrarlanmamasına çağırış edib.

Publika.az xəbər verir ki, Bayden Konqresə basqın günü baş verənləri unutmamağa çağırıb.

“Dörd il əvvəl baş verənlərin təkrarını qəbul edə bilmərik. Dörd ildən sonra prezident ofisindən ayrılarkən hakimiyyətin dinc yolla ötürülməsinə hörmət etməliyik. Amerikada ənənələrin bərpasını təmin etmək üçün əlimdən gələni etməyə qərarlıyam. Seçkilər sülh yolu ilə təsdiqlənməlidir”, - deyə ABŞ prezidenti qeyd edib.

O, Trampın prezidentlik kürsüsünə keçəcəyi mərasimə qatılacağını da əlavə edib.

Qeyd edək ki, 6 yanvar 2021-ci ildə ABŞ-ın o zamankı prezidenti Donald Trampın tərəfdarları 3 noyabr 2020-ci il seçkilərinin saxtalaşdırıldığını iddia edərək, Vaşinqtondakı “National Mall” ərazisində etiraz aksiyası keçirdilər.

Aysel Şahmar