Habil Əliyevin xatirəsi konsertlə yad ediləcək

Mədəniyyət və Turizm Nazirliyinin təşkilatçılığı ilə bugün saat 16.00-da Beynəlxalq Muğam Mərkəzində Gənc kamança ifaçılarının Habil Əliyev adına I respublika müsabiqəsinin yekun konserti keçiriləcək.

Publika.az xəbər verir ki, müsabiqənin keçirilməsində məqsəd respublikada kamança ifaçılığı sənətinin inkişaf etdirilməsi, gənc istedadların üzə çıxarılması, eyni zamanda, məşhur kamança ifaçısı Habil Əliyevin xatirəsinin əbədiləşdirilməsidir.

Üzeyir Hacıbəyli adına Bakı Musiqi Akademiyasının professoru, Əməkdar İncəsənət xadimi Arif Əsədullayevin sədrlik etdiyi, tanınmış mütəxəssislərdən ibarət münsiflər heyəti 150 gənc kamança ifaçısının çıxışını qiymətləndirib.

Münsiflər heyətinin qərarına əsasən Bakı, Gəncə, Şəki, Şirvan şəhər, Ağdaş, Ağstafa, Füzuli, Goranboy, Kürdəmir, Oğuz, Samux, Siyəzən, Şəmkir, Şuşa rayon uşaq musiqi və incəsənət məktəblərinin şagird və müəllimləri müsabiqənin müxtəlif dərəcəli diplomlarına, fəxri fərmanlarına və pul mükafatlarına layiq görülüb.

Cəvahir