Ramiz Rövşən: “Heç vaxt barışmayacam” - VİDEO

Azərbaycan ən sevilən şairlərindən olan, söhbətində və şeirlərində hər zaman səmimiyyətini qoruyan Ramiz Rövşənin doğum günüdür. Qocalığı ilə barışmayan, yaşayıb yaratmaq üçün hələ gənc olduğunu deyən və qarşıda çox zamanının qaldığını söyləyən şairə Publika.az olaraq bir neçə sual ünvanlayıb geridə qalan 70 ilə qısa nəzər saldıq.

- Ramiz müəllim, 70 yaş sizi üçün nə deməkdir?

- 70 illik ömür deməkdir. Mənim heç təsəvvürümə gəlməyən qədər böyük zamandır.

- Qocaldığınızı hiss edirsinizmi?

- Qocalıq insan onunla barışanda başlayır. Qocalıq daxili bir vəziyyətdir. Qocalıq saçın ağarması, üzün qırışması deyil. İnsan qocalıqla 50-də barışa və ya 70 yaşında heç barışmaya bilər.

- Bəs siz necə qocalıqla barışmısınızmı?

- Mən elə gəlir ki, mən qocalıqla heç vaxt barışmayacam. Bir şeirim var. Orada belə bir misra var: “Çətindir dünya ilə barışmağım”. Fikrimcə, elə qocalıqla barışmağım da çətindir. İkisi də mənim üçün eyni şeydir. O fikirlə razı deyiləm ki, ömrün çoxu gedib, azı qalıb. Mənə elə gəlir ki, ömürdən nə qədər getsə də çoxu qalıb. Gedən artıq gedib. Bütün anlar da yaşanıb, bütün acıları və sevincləri ilə birlikdə, hətta yazdıqlarınla birlikdə. Qalan ömrü yaşamaq lazımdır, günbəgün, saatbasaat...

- Geridə qalan bu 70 illik ömür yolunda istədiyiniz diqqəti görə bildinizmi?

- Əlimə qələm alandan, hansısa şəxslərin şairi olmaq düşüncəsində yaşayan biri olmamışam. Mən dövlət qurumları üçün yazmıram, millət üçün yazıram. Əslində isə hamıdan əvvəl özüm üçün yazıram. İçimdəki dərddən, ağrıdan azad olmaq üçün yazıram. İnsan azad olmaq üçün yazır. Şair azad olduqca, onu oxuyanlar da azad olur. Poeziyanın bir funksiyası da budur. Şair və oxucu bu təkbətək ünsiyyətdir. Çünki şeirin sərhədi yoxdur. Buna görə də, mənim bəlkə də minlərlə, on minlərlə oxucum var. Bir kəlmə onu deyim ki, mən oxucularımdan gözlədiyimdən də artıq sevgi və məhəbbət görmüşəm.

Biz də Publika.az kollektivi olaraq Ramiz Rövşəni təbrik edir, uzun ömür, möhkəm can sağlığı arzulayırıq!

Mələk Heydərova