Fransada seçkilər - Makronun koalisiyası MƏĞLUB OLUR

Fransanın Milli Ralli partiyası respublika parlamentinə keçirilən seçkilərin birinci turunda qalib gəlib.

Publika.az xəbər verir ki, bu barədə ölkənin Daxili İşlər Nazirliyi məlumat yayıb.

Bildirilib ki, siyasi birlik 34,2 faiz səs toplayıb. Bunun sayəsində Milli Ralli qanunverici orqanda 240-dan 270-ə qədər yer əldə edə bilər. Fransa parlamentində 577 yer var.

Eyni zamanda, səsvermənin birinci turunun nəticələrinə görə ikinci yerdə Yeni Xalq Cəbhəsi koalisiyası qərarlaşıb. O, Üsyankar Fransa Partiyası, Sosialist Partiyası, Yeni Anti-Kapitalist Partiyası, Kommunist Partiyası və Avropa Ekologiya Yaşıllar Partiyasından ibarətdir. Daxili İşlər Nazirliyinin məlumatına görə, vətəndaşların ümumilikdə 29,1 faizi bu koalisiyaya səs verib. Beləliklə, birlik qanunverici orqanda 180-200 yerə arxalana bilər.

Üçüncü yerdə isə öz növbəsində “Respublika naminə birlikdə” prezident bloku qərarlaşıb. Üç partiyadan - Dirçəliş, Demokratik Hərəkat və Üfüqlərdən ibarət birlik 21,5% səs toplayıb. Bu səbəbdən hazırkı dövlət başçısı Emmanuel Makronun koalisiyası parlamentdəki 160-dan çox mandatı itirmək və yeni çağırışda 90-dan çox yer qazanmamaq riski ilə üzləşir.

Hüseyn İbadlı