Aİ Rusiya ilə müharibəyə hazırlaşır: sakinlərə qida və su ehtiyatı yığmaq tapşırıldı

Avropa İttifaqına üzv ölkələrin sakinlərinə müharibə və ya digər böyük fövqəladə hallar zamanı ərzaq və zəruri əşyalar yığmaq tapşırılıb.

Publika.az "Newsweek" nəşrinə istinadla xəbər verir ki, müvafiq tövsiyə Avropa Komissiyası prezidentinin müşaviri və Finlandiyanın keçmiş prezidenti Sauli Niinistyo tərəfindən yazılan Avropanın mülki və hərbi hazırlığı haqqında hesabatda qeyd olunub.

Qeyd edildiyi kimi, Aİ COVID-19 pandemiyasına və Rusiyanın Ukraynaya qarşı müharibəsinə hazır deyildi və buna görə də “reaksiyadan fəal hazırlığa” keçmək qərara alınıb. Buna görə də ev təsərrüfatlarına fövqəladə hallar zamanı ən azı 72 saat özünü təmin etməyə hazır olmaları tövsiyə olunub.

Sənəd üzv dövlətlərə “vətəndaşlarına ehtiyat toplama, evakuasiya və fövqəladə hallar xidmətlərinə çıxışla bağlı təlimat verməyi” tövsiyə edir. Söhbət tez xarab olmayan qida, su, dərman, fənərlər, batareyalar və portativ radiodan gedir. Əsas təhlükə Rusiyanın mümkün hücumu kimi müəyyən edilir.

"Bizim Avropa İttifaqının üzv dövlətə qarşı silahlı təcavüz olacağı təqdirdə nə edəcəyi ilə bağlı dəqiq planımız yoxdur. Rusiyanın Avropa təhlükəsizliyi üçün yaratdığı müharibə təhlükəsi bizi hazırlıq görməyə məcbur edir. Həmçinin digər ciddi təhdidlərə hazırlaşmaq üzrə işlər aparılır”, - hesabatda qeyd olunur.

Niinistyo bildirib ki, hərtərəfli hazırlıq strategiyasının əsası vətəndaşların səlahiyyətlərinin artırılması olmalıdır. Xüsusilə, Aİ əhali arasında özünütəminat strategiyasını maarifləndirməli və təşviq etməlidir. Siyasətçi həmçinin təhlükəsizliyi gücləndirmək və böhranlara cavab vermək üçün Aİ büdcəsini 20% artırmağı tövsiyə edib. Digər əsas məsələ kimi, üzv ölkələr arasında kəşfiyyat məlumatlarının mübadiləsinin artması göstərilir.

Akqabay