Bu Avropa ölkəsi 200 gündür hökumət qura bilmir

3 rəsmi dili olan və bir çox etnik qrupların yaşadığı Belçikada 200 gündür hökumət qurulmayıb. Ölkə federal parlament sistemi ilə idarə olunur və 6 fərqli bölgədə 6 fərqli hökumət var.

Publika.az xəbər verir ki, federal sistemlə idarə olunan Qərbi Avropa ölkəsi Belçika tarixində dəfələrlə yaşandığı kimi, hökumətin qurulmasında növbəti dəfə böhran müşahidə olunur.

Başda Avropa İttifaqı (Aİ) və NATO olmaqla bir çox beynəlxalq təşkilatlara ev sahibliyi edən, təxminən 12 milyon əhalisi olan bir ölkədə hökumət qurma prosesi bir-birinin ardınca rekordlar qırılması ilə dünyanın gündəmini zəbt edir.

Ölkə 1979-cu il seçkilərindən sonra 107 gün, 1988-ci ildə 148 gün, 2007-ci ildə 194 gün, 2010-cu ildə 541 gün və 2019-cu il seçkilərindən sonra 652 gün hökumətsiz qalıb.

Belçika hətta sülh dövründə hökumətsiz ən uzun müddət kateqoriyasında “Ginnesin Rekordlar Kitabı”na düşüb.

Dörd ildən bir keçirilən ümumi seçkilər bu il iyunun 9-da Avropa Parlamentinə seçkilərlə eyni tarixdə baş tutub.

Son illərdə Avropa siyasətində görülən sağa keçid, radikal millətçi Yeni Flamand Alyansının (N-VA) federal səviyyədə 16,71 faiz səslə birinci olduğu Belçikada keçirilən sorğunun nəticələrinə də təsir edib.

Qeyd edək ki, Belçikanın federal parlamentində 150 ​​yer var və bir partiya təkbaşına hakimiyyətə gəlmək üçün ən azı 76 yer qazanmalıdır.

Qalib partiyalar bu çoxluğu əldə edə bilmədiyi üçün hökuməti qurmağın yeganə yolu koalisiyadır.

Aysel Şahmar