Berlində tələbələr universitetin girişini bağladılar

Tələbələr Berlində Alice Salomon Tətbiqi Elmlər Universitetinin binasına əsas girişi bağlayıblar.

Publika.az xəbər verir ki, bu barədə paytaxt polisinin mətbuat xidməti X sosial şəbəkəsində məlumat yayıb.

“Bir neçə nəfər mebel və digər əşyalardan istifadə edərək ali təhsil müəssisəsinin əsas girişini bağlayıb. Hazırda bu aksiya kortəbii toplantı kimi qiymətləndirilir və universitet tərəfindən keçirilməsinə icazə verilir”, — deyə paylaşımda bildirilir.

Universitetdən verilən məlumata görə, binaya giriş yan qapı vasitəsilə mümkündür. Aksiyada ümumilikdə 100-ə yaxın tələbə iştirak edib və onlar dinc davranıblar.

Universitet nümayəndəsinin sözlərinə görə, aksiya iştirakçıları tələblər siyahısı təqdim ediblər, lakin o, həmin tələbləri sadalamayıb. Bununla belə, nümayəndə aksiyanın Fransadakı etirazlara həmrəylik əlaməti olaraq keçirildiyini bildirib.

Bundan əvvəl Bild nəşri yazmışdı ki, oktyabrın 31-i şənbə günü Almaniyanın Berlin, Hamburq, Köln, Münhen və Frankfurt da daxil olmaqla 20-dən çox şəhərində genişmiqyaslı gənclər etirazları planlaşdırılıb. Almaniyanın xüsusi xidmət orqanları və Daxili İşlər Nazirliyi rəsmi dinc nümayişlərin radikallar tərəfindən ələ keçirilə biləcəyindən narahatdır.

Etirazların əsas təşəbbüskarları “Gen Z regelt” (“Z nəsli hər şeyi yoluna qoyacaq”) və “Gen Z steht auf” (“Z nəsli ayağa qalxır”) adlı zumer birlikləridir. Fəallar məktəblərin maliyyələşdirilməsinin azaldılmasına, yaşayış xərclərinin artmasına, kirayə haqlarının yüksək olmasına, eləcə də məcburi hərbi xidmətin yenidən tətbiq edilməsi ehtimalına qarşı çıxırlar.

Hüseyn İbadlı