"Şəkər davası" qanla bitdi: Qonşusunu park yeri üstündə öldürdü

Rusiyanın Dzerjinsk şəhərində park yeri üstündə başlayan mübahisə faciə ilə nəticələnib.

Publika.az Rusiya mətbuatına istinadən xəbər verir ki, əlil yaşlı kişi həyətlərində uzun müddət istifadə etmədiyi avtomobili saxlayırmış. Bu vəziyyət isə qonşusunu ciddi şəkildə qıcıqlandırıb. O, dəfələrlə qalmaqal yaradıb, avtomobilin təkərlərini boşaldıb, benzin çəninə şəkər tökərək ziyan vurub və maşının sahibini mütəmadi olaraq hədələyib. Zərərçəkən polisə müraciət etsə də, bu addım aqressiv qonşunu dayandırmayıb.

Hadisə qarlı günlərin birində baş verib. Yaşlı kişi avtomobilini qardan təmizləmək üçün həyətə düşərkən, aqressiv qonşu ona yaxınlaşıb. Əvvəlcə tərəflər arasında mübahisə yaranıb, daha sonra isə dava başlayıb. Qonşu yaşlı kişini sinəsindən vuraraq yerə yıxıb və onu təpikləməyə başlayıb. Hadisə şahidləri müdaxilə etməyə çalışsalar da, zərərçəkəni ayağa qaldıra bilməyiblər.

Ağır vəziyyətdə xəstəxanaya çatdırılan kişi bir neçə gün həkim nəzarətində qalıb. Lakin aldığı ağır xəsarətlər səbəbindən onun həyatını xilas etmək mümkün olmayıb. Həkimlər ölümün döş qəfəsinin küt travması və bunun yaratdığı fəsadlar nəticəsində baş verdiyini açıqlayıblar.

İstintaq zamanı şahid ifadələri, müşahidə kameralarının görüntüləri və ekspert rəyləri toplanıb. Təqsirləndirilən şəxs mübahisə faktını etiraf etsə də, öldürmək niyyətinin olmadığını bildirib.

Məhkəmənin qərarı ilə o, ehtiyatsızlıqdan adam ölümünə səbəb olmaqda təqsirli bilinərək 6 il müddətinə azadlıqdan məhrum edilib. Cəzasını ciddi rejimli cəzaçəkmə müəssisəsində çəkəcək. Bundan əlavə, o, mərhumun ailəsinə mənəvi zərərin ödənilməsi üçün kompensasiya da ödəməlidir.

Müəllif: Adəm