Doğum evində dəhşət: Körpənin kəllə sümüyünü sındırdılar - 1,5 milyonluq təzminat tələb olunur

Rusiyanın Kamçatka vilayətində doğum evində dəhşətli hadisə baş verib. Doğuş zamanı həkimlərin səhlənkarlığı nəticəsində yeni doğulmuş körpə ağır xəsarət alıb.

Publika.az Rusiya mediasına istinadən xəbər verir ki, anaya qeysəriyyə əməliyyatı gecikmə ilə edilib.

Əməliyyatdan sonra körpədə kəllə sümüyünün (təpə-gicgah nahiyəsinin) batıq sınığı və qıcolma sindromu aşkar olunub.

Vəziyyəti sürətlə pisləşən körpə təcili olaraq müalicə üçün Sankt-Peterburqa göndərilib. Aparılan ekspertizalar nəticəsində məlum olub ki, həkimlər əməliyyatı vaxtında həyata keçirməyiblər. O da məlum olub ki, tibbi sənədlərdə körpənin aldığı bu ağır travma barədə heç bir qeyd aparılmayıb, fakt gizlədilməyə çalışılıb.

Məhkəmə Kamçatka həkimlərinin anaya yanlış tibbi yardım göstərdiyini təsdiqləyib. Qərara əsasən, doğum evi zərərçəkmiş anaya və ataya 1,5 milyon rubl (təxminən 28 min manat), nənələrə isə 200 min rubl təzminat ödəməlidir. Lakin tibb müəssisəsinin rəhbərliyi bu qərarla razılaşmayaraq apellyasiya şikayəti verib.

Hazırda faktla bağlı araşdırmalar davam edir.

Müəllif: Adəm