Fırıldaqçılardan yeni təhlükə: Süni intellektlə “polis səsi” saxtalaşdırılır

Rusiyada fırıldaqçılar süni intellektdən istifadə edərək İstintaq Komitəsi (SK) və Daxili İşlər Nazirliyi (DİN) əməkdaşlarının səslərini saxtalaşdırmağa başlayıblar.

Publika.az xəbər verir ki, bu barədə Rusiya Daxili İşlər Nazirliyi məlumat yayıb.

Bildirilib ki, dələduzlar “deepfake” texnologiyası vasitəsilə real vaxt rejimində səs sintezi edərək həm qohumların, həm də rəsmi şəxslərin səsini təqlid edə bilirlər. Artıq SK və DİN əməkdaşlarının səslərinin saxtalaşdırıldığı halların qeydə alındığı bildirilir.

Məlumata əsasən, 2025-2026-cı illərdə fırıldaqçıların süni intellektdən istifadəsi daha da genişlənib. Onlar neyron şəbəkələr vasitəsilə foto-real görünüşlü saxta sənədlər də hazırlayırlar. Bu sənədlərdə adətən xırda detalların olmaması, fonun təhrif edilməsi və daxili uyğunsuzluqlar müşahidə olunur.

Bundan başqa, cinayətkarlar süni intellektlə məşhur şəxslərin iştirakı ilə saxta videolar da yaradırlar. Həmin videolarda guya müxtəlif ödənişlərin və “bonusların” elan edildiyi göstərilir.

Məlumatda qeyd olunur ki, fırıldaqçılar artıq fişinq hücumlarını da süni intellekt əsaslı botlar vasitəsilə həyata keçirirlər.

Adəm