Müəllimi güllələməkdə təqsirləndirilən şagirdin vəkilinin vəsatəti təmin edilmədi

"İdrak" liseyində müəllimi güllələməkdə təqsirləndirilən şagirdin cinayət işi üzrə məhkəmə prosesi keçirilib.

Publika.az Teleqraf-a istinadən xəbər verir ki, Bakı Ağır Cinayətlər Məhkəməsində hakim Vüqar Quliyevin sədrliyi ilə keçirilən prosesdə anket məlumatları dəqiqləşdirilib.

Təqsirləndirilən şəxsin vəkili Rəşad Mirmehdizadə vəsatət verib.

O bildirib ki, məhkəmə iclasının qapalı keçirilməsini xahiş edib.

Təqsirləndirilən şəxs yetkinlik yaşına çatmadağı üçün iclas qapalı keçirilsin.

Həbs qətimkan tədbirinin ev dustaqlığı ilə əvəz olunmasını məhkəmədən xahiş edirəm. Zərərçəkmiş şəxslə barışıq var.

Zərərçəkmiş şəxsin qanuni nümayəndəsi məhkəmədən prosesinin qapalı keçirilməsini xahiş edib.

Müşavirədən sonra qərar elan olunub.

Qərara əsasən, cinayət işi məhkəmə baxışına verilib və baxış iclası iyulun 1-nə təyin edilib. Təqsirləndirilən şəxs barəsində seçilmiş həbs qətimkan tədbiri qüvvədə saxlanılıb. İşin qapalı keçirilməsi ilə bağlı vəsatət də təmin edilməyib və proseslərin açıq keçirilməsinə qərar verilib.

Xatırladaq ki, hadisə bu ilin fevralın 6-da paytaxtın Binəqədi rayonunda yerləşən “İdrak” liseyində baş verib.

Baş Prokurorluğun Mətbuat xidmətinin yaydığı məlumata görə, məktəbdə şagird tərəfindən odlu silahdan atəş açılmaqla müəllimə xəsarət yetirilməsi faktı ilə bağlı rayon prokurorluğuna məlumat daxil olub. Hadisəni törətməkdə şübhəli bilinən şagird saxlanılıb.

Fevralın 7-si Binəqədi Rayon Məhkəməsinin qərarı ilə onun barəsində 4 ay müddətə həbs qətimkan tədbiri seçilib.

Faktla bağlı Binəqədi rayon prokurorluğunda Azərbaycan Respublikasının Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanaraq ibtidai istintaq aparılıb.