Sərxoş ata iki yaşlı qızının həyatına son qoydu - Dəhşətli faciə

ABŞ-ın Texas ştatında iki yaşlı qızın ölümü ilə nəticələnən dəhşətli hadisə baş verib.

Publika.az xəbər verir ki, 25 yaşlı Lorenzo Rodriqes azyaşlı qızını saatlarla bağlı avtomobildə qoyduğu üçün ağırlaşdırıcı hallarla qəsdən adam öldürməkdə ittiham olunub.

Hadisə bazar günü axşam saatlarında üzə çıxıb. "People" nəşrinin məlumatına görə, Rodriqesin qohumları gecə məclisindən sonra ata və qızın vəziyyəti ilə maraqlanmaq üçün evə gəliblər. Qapını uzun müddət döysələr də, heç kim açmayıb. Nəticədə onlar pəncərdən kondisioneri çıxararaq evə daxil olublar.

Evdə Lorenzo Rodriqesi dərin yuxuda tapıblar. Məlum olub ki, o, spirtli içki qəbul edib və səhər saat 11-dən bu vaxta qədər yatıb.

Qohumlar iki yaşlı qızın evdə olmadığını görərək çölə çıxıblar. Onlar bağlı avtomobilin içərisində körpəni huşsuz vəziyyətdə aşkar ediblər. Mühərriki sönmüş avtomobilin içərisi həddindən artıq isti olub. Ailə üzvləri şüşəni sındıraraq uşağı çıxarıb təcili xəstəxanaya çatdırsalar da, həkimlər onun həyatını xilas edə bilməyiblər.

Polis həmin axşam Lorenzo Rodriqesi saxlayıb. İstintaq müəyyən edib ki, o, sərxoş vəziyyətdə azyaşlı qızını uzun müddət nəzarətsiz şəkildə bağlı avtomobildə qoyub. Məhkəmə onun barəsində 1,5 milyon dollar məbləğində girov təyin edib. Hazırda Rodriqes həbsdə saxlanılır.

Müəllif: Adəm