Əlil qızın zorlanması 78 polisin işdən uzaqlaşdırılması ilə nəticələndi

Pakistanın Lahor şəhərində polis bölməsində 20 yaşlı əlil qızın zorlanması iddiası ölkədə böyük qalmaqala səbəb olub. Hadisədən sonra polis məntəqəsinin bütün 78 əməkdaşı və xidməti personalı vəzifədən uzaqlaşdırılıb.

Publika.az xəbər verir ki, bu barədə "The Guardian" məlumat yayıb.

Zərərçəkən qız polis köməkçi müfəttişi tərəfindən saxlanıldığını, Lahorun Qaziabad polis bölməsinə aparıldığını və binanın ikinci mərtəbəsində zorlandığını bildirib. Ailəsi isə qızın küçədə itkin düşdükdən sonra göz yaşları içində evə qayıdaraq polis bölməsində cinsi zorakılığa məruz qaldığını dediyini açıqlayıb.

İttiham olunan polis əməkdaşı saxlanılıb və barəsində cinayət işi açılıb. Lahor polisinin əməliyyatlar üzrə rəis müavini Feysal Kamran bildirib ki, polis qaydalarına əsasən, bölmədə xidmət aparan bütün əməkdaşlar qanun pozuntularının qarşısını almağa və belə halları rəhbərliyə bildirməyə borcludurlar. Bu səbəbdən polis məntəqəsinin bütün heyəti işdən uzaqlaşdırılıb.

Onun sözlərinə görə, heç bir əməkdaş qadının polis bölməsinə qadın polis müşayiəti olmadan gətirilməsinə etiraz etməyib. Hazırda fakt üzrə gender cinayətləri şöbəsi araşdırma aparır.

Hadisə Pakistanda ciddi ictimai narazılıq doğurub. Hüquq müdafiəçiləri bildirirlər ki, qadınlar polisə etimadsızlıq və cəmiyyətdəki damğalanma səbəbindən cinsi zorakılıq halları barədə çox vaxt şikayət etmirlər. Onların fikrincə, hüquq-mühafizə orqanlarının əməkdaşlarının belə cinayətlərdə ittiham olunması ictimai etimadı daha da sarsıdır.

Müəllif: Adəm