Məşhur qəzetin əməkdaşı parkda güllələndi - Qayınatası və qayınanası saxlanıldı

ABŞ-da “The New York Times” qəzetinin əməkdaşı Conatan Makkinzi güllələnərək öldürülüb. Hadisə San-Fransisko yaxınlığındakı Dublin şəhərində yerləşən idman kompleksinin dayanacağında baş verib.

Publika.az xəbər verir ki, oyun xidmətlərinin mühəndislik istiqamətinə rəhbərlik edən 40 yaşlı Makkinzi Dublində "Sports Grounds" kompleksinin dayanacağında çoxsaylı güllə yaraları ilə tapılıb. Hadisə yerindən keçən polis serjantı onun yerdə uzandığını görüb. Demək olar ki, eyni vaxtda şahidlər 911 xidmətinə zəng ediblər. Hadisə yerinə gələn həkimlər Makkinzinin öldüyünü müəyyənləşdiriblər.

Şahidlərin köməyi ilə polis şübhəlilərin yerini müəyyənləşdirib. Qətlə görə Makkinzinin həyat yoldaşının valideynləri - 77 yaşlı Şou Yun Çjan və Şili Çen saxlanılıb. Onlar hadisə yerindən uzaqlaşmayıb və bir neçə dəqiqə ərzində tutulublar. Hər iki şəxs Santa Rita həbsxanasına aparılıb.

Dublin polisi iş üzrə başqa şübhəlinin axtarılmadığını açıqlayıb. Araşdırma davam edir.

Məhkəmə sənədlərinə görə, Makkinzi və həyat yoldaşı boşanma prosesində olub və uşağın qəyyumluğu ilə bağlı mübahisə ediblər. Qadın daha əvvəl ərinə qarşı müvəqqəti qoruyucu qərar çıxarılmasına nail olub və məişət zorakılığı barədə müraciət edib. Məhkəmə materiallarında uşağa qarşı zorakılıqla bağlı ittihamlar da yer alıb.

Bu hallar qətlin araşdırılması çərçivəsində nəzərdən keçirilir. Lakin polis hələlik qətlin motivini açıqlamayıb və saxlanılan şəxslərin hər birinin hadisədə hansı rolu oynadığını bildirməyib.

Müəllif: Adəm