Dalğa səviyyəsi 4 metr yüksəlir, küləyin sürəti 80 metrə çatır - VİDEO

Son 50 ilin ən güclü tayfunu kimi xarakterizə olunan “Hayşen”in sürəti saatda 290 km-ə çatıb.

Publika.az xəbər verir ki, tayfunun mərkəzində küləyin sürəti saniyədə 80 metr təşkil edir.

Qasırğa özü ilə 150 millimetrə qədər yağıntı gətirib. Bəzi bölgələrdə bu rəqəm 200 millimetrdir.

Rəsmi məlumatlara görə, Yaponiyanın cənub-qərbində 1,6 milyondan çox insan təxliyə edilməlidir. Bundan əlavə, hökumət yerli hakimiyyət orqanlarına təxminən 6 milyondan çox insanın təhlükəli bölgələrdən çıxarılmasını tövsiyə edib.

Yaponiya mətbuatının verdiyi məlumata görə, fəlakət səbəbindən ən azı 50 nəfər yaralanıb. Güclü küləklər yüz minlərlə evin elektrik enerjisinin itməsinə səbəb olub. Elektrik xətlərinə ciddi ziyan dəyib.

Tayfun artıq Cənubi Koreya sahillərinə çatıb. Meteoroloqlar “Hayşen”in Şimali Koreyanın Conqjin şəhərinə çatana qədər zəifləyəcəyini proqnozlaşdırır.

“Hayşen” tayfunu səbəbilə 9 sentyabr tarixinə qədər fırtına xəbərdarlığı edilib. Küləyin sürətinin saniyədə 32 metrə qədər yüksələcəyi, dənizdə dalğaların 4 metrə çatacağı gözlənilir.

Zümrüd