Digər

Çin Hindistanla müharibədəki itkilərini açıqladı - RƏSMİ

19 Fevral 2021 14:46

Çin Hindistan ilə 2020-ci ildə Qalvan vadisində yaşadığı sərhəd münaqişəsində 4 hərbçisini itirib.

Publika.az xəbər verir ki, bu barədə “Çin Xalq Azadlıq Ordusu Gündəliyi” qəzeti məlumat yayıb.

Xəbərə görə, Hindistan ordusu körpü və yol inşası üçün sərhəd xəttini keçib, sərhəd boyunca statusu dəyişdirərək qəsdən problem yaratmağa çalışıb. Çin ordusu təmas qurmaq üçün 4 hərbçi göndərsə də, Hindistan həmin əsgərləri öldürüb.

Çin mətbuatında hərbçilərin adları Çın Honqcün, Çın Şianqronq, Şiao Sıyüen və Vanq Cuoran olaraq açıqlanıb.

Bu, Çin hökumətinin sərhəddəki münaqişə zamanı verdiyi itkilərlə bağlı ilk rəsmi açıqlamasıdır.

Qeyd edək ki, Hindistan 2020-ci ilin iyun ayında baş verən insident zamanı 20 əsgərinin öldüyünü açıqlamışdı. Çinin isə 45 əsgər itirdiyi və ya yaralandığı iddia edilmişdi. Çin bu iddiaları təkzib etməmişdi.

Zümrüd