Çin Tayvanı müharibə ilə HƏDƏLƏDİ: Ordu hazır vəziyyətə gətirildi

Çin və Tayvan arasında gərginlik davam edir. Çindən gələn son xəbərlərə görə, böhran ən yüksək həddə çatıb.

Publika.az xarici mətbuata istinadla xəbər verir ki, Çin Kommunist Partiyasının nəzarətində olan dövlət mediası açıq şəkildə müharibə təhdidini davam etdirib.

Çində yerləşən “Global Times” xəbər agentliyi Çin ordusuna “döyüşə hazır olun” əmri verildiyini bildirib.

Çindən gələn bu xəbərdən sonra Tayvan ordusunun da hazır vəziyyətə gətirildiyi qeyd edilir.

İki ölkənin hərbi qüvvələri müqayisə edildikdə, Çinin 2,1 milyon əsgəri, 3260 təyyarəsi və 3205 tankı ilə Tayvan üzərində üstünlüyə malik olduğu aydın olur.

Bu arada Çinin tayvanla bağlı həyata keçirdiyi hərbi fəaliyyətlərin peyk görüntüləri ortaya çıxıb.

Çinin cənub-şərq sahilindəki Fujian əyalətindəki üç baza Tayvanla hava qarşıdurması vəziyyətində müdafiə sistemləri ilə gücləndirilib.

"Planet Labs" tərəfindən çəkilən və ABŞ-ın avtomobil və hərbi veb saytı "The Drive" tərəfindən ilk dəfə yayımlanan fotoşəkillər, infrastrukturun çoxunun 1980-ci illərə aid olduğu bazalarda inşaat işlərinin 2020-ci ilin əvvəlində başladığını və pandemiya boyunca davam etdiyini göstərir.

Rahib Əsgərov