Çinin ABŞ-ı qorxudan GİZLİ PLANI: hərbi baza qurur

ABŞ kəşfiyyatı Çinin Birləşmiş Ərəb Əmirliklərində (BƏƏ) gizli şəkildə hərbi obyekt qurmağa çalışdığını öyrəndiyi və bu vəziyyətin ABŞ ilə BƏƏ arasında sıx diplomatik gediş-gəlişə səbəb olduğu iddia edilib.

Publika.az xəbər verir ki, Amerika mətbuatının məlumatlı mənbələrə əsaslanaraq verdiyi xəbərə görə, Çinin Əbu-Dabidən 50 kilometr şimalda yerləşən Xəlifə limanında gizli şəkildə hərbi obyekt qurmağa çalışdığı qeyd olunub.

Məlumatda qeyd olunur ki, ABŞ Prezidenti Co Bayden administrasiyası peykdən bununla bağlı görüntülər əldə edib. Bundan sonra BƏƏ hökumətinə Çinin ölkədə olması ilə bağlı xəbərdarlıq edib və bu mövzuda iki ölkə rəsmiləri arasında intensiv müzakirələr başlayıb.

Baydenin may və avqust aylarında BƏƏ-nin vəliəhd şahzadəsi Məhəmməd bin Zayed Əl Nəhyanla iki dəfə birbaşa danışdığı bildirilir. Bu danışıqlardan sonra ABŞ-ın təzyiqi ilə tikinti işləri dayandırılıb.

BƏƏ səlahiyyətliləri Çinin Xəlifə Limanında sıx ticarət fəaliyyətinin olduğunu təsdiqləsə də, gizli şəkildə hərbi baza qurma cəhdi ilə bağlı hər hansı məlumatın olmadığını bildirib.

Rahib Ələsgərov