Digər

Rusiya qırıcıları İdlibi bombaladı

3 Yanvar 2022 11:03

10 ildən artıqdır ki, zorakılıq və xaosun davam etdiyi Suriya yeni ildə qarşıdurmalara və hücumlara səhnə olur. "Reuters" Rusiya qırıcılarının ötən gecə İdlibi bombaladığı barədə xəbər yayıb.

Publika.az xəbər verir ki, "Reuters"ə danışan şahidlər və mənbələr Rusiya ordusunun Əsəd müxaliflərinin nəzarəti altında olan və Türkiyə sərhədinə yaxınlığı ilə tanınan İdlibə hücum etdiyini deyib.

Rusiyanın İdlibi "Sukhoi" təyyarələri ilə vurduğu qeyd edilib. Bildirilib ki, 1 milyondan çox insanın yaşadığı bölgədə “Arşani” su paylayıcı və nasos stansiyası bombalanıb.

Hücum zamanı su stansiyasının yarasız vəziyyətə düşdüyü bildirilir.

Bundan başqa, hadisədə 1 mülki şəxs də yaralanıb.

Hadisə şahidlərinin verdiyi məlumata görə, son 24 saat ərzində Türkiyə ilə Suriya arasındakı Bab əl-Hava Sərhəd Qapısı yaxınlığındakı heyvandarlıq fermaları da hədəfə alınıb.

Rahib Ələsgərov