Qəzaya görə səhmdarlara 97 milyard dollar ödəniləcək

Tokio məhkəməsi “Tokyo Elelctric Power Co.” şirkətinin dörd sabiq rəhbərinin səhmdarlara vurulan zərər müqabilində 97 milyard dollar ödəməsi barədə qərar qəbul edib.

Publika.az xəbər verir ki, bu barədə qərar iyulun 13-də Tokio dairə məhkəməsinin hakimi tərəfindən qəbul edilib. Səhmdarlar bildirirlər ki, şirkət məhz “Fukusima-1” AES-də 2011-ci ildə baş verən qəzaya görə böyük zərər çəkib. Buraya AES-in zərərçəkmiş reaktorlarının istismardan çıxarılması və təxliyəyə məcbur olan yerli sakinlərə kompensasiyanın ödənilməsi daxildir.

Qeyd edilir ki, səhmdarlar şirkətin rəhbəri olmuş 5 şəxsdən 22 trilyon yen (təqribən 160 milyard dollar) ödənməsi ilə bağlı iddia irəli sürüblər.

Məhkəmə qəzadan doqquz il əvvəl, 2002-ci ildə hökumət yanındakı şuranın AES-in seysmik fəal zonada yerləşməsi barədə hesabatına diqqəti yönəldib.

Səhmdarlar bildirirlər ki, şuranın bu hesabatı şirkət rəhbərləri üçün əsas götürülməli idi.

Xatırladaq ki, səhmdarlar həmin iddia ilə məhkəməyə 2012-ci ildə müraciət ediblər. Ötən ilin oktyabrında məhkəməyə sədrlik edən hakim ilk dəfə AES-in ərazisində olub.