Prezidentliyə namizədlər bəlli oldu

Şri-Lankada iyulun 20-də keçiriləcək prezident seçkisində mübarizə aparacaq namizədlər müəyyənləşib.

Publika.az xəbər verir ki, müxalifətin lideri Sacit Premadasanın namizədliyini geri götürməsi ilə dövlət başçısı postu uğrunda seçkiyə qatılanların sayı 3-ə düşüb.

Onlar hazırki baş nazir (prezident səlahiyyətlərini müvəqqəti icra edən-red.) Ranil Vikramasinkhi, parlament üzvləri Anura Kumara Dissanayek və Dullas Alahapperumadır.

Qanunvericiliyə uyğun olaraq prezidenti parlament seçəcək. Yeni prezident əvvəlki dövlət baçısı Qotabaya Racapaksanın səlahiyyət müddətindən qalan 2 il ərzində vəzifədə olacaq. 2024-cü ildə növbəti ölkədə yeni prezident seçkisi keçiriləcək.

Qeyd edək ki, Şri-Lanka 1948-ci ildə müstəqillik əldə etdikdən bu yana ən dərin iqtisadi böhran yaşayır. Şri-Lanka xarici valyuta, yanacaq və neft məhsulları, gübrə, qida məhsulları, həmçinin tibbi preparatların qıtlığı ilə üzləşib. Bu səbəbdən əhalinin yaşayış səviyyəsi kəskin aşağı düşüb.

Tural Turan