Pelosinin təyyarəsinin hərəkətini izləyən sayt fəaliyyətini dayandırdı

Təyyarələrin hərəkətlərini real vaxt rejimində nümayiş etdirən İsveçin “FlightRadar24” saytı işini dayandırıb.

Publika.az xəbər verir ki, sayta daxil olmaq istəyərkən xəta haqqında məlumat verilir.

Saytın bağlanmasına səbəb kimi ABŞ Nümayəndələr Palatasının spikeri Nensi Pelosinin marşrutunu izləməyə çalışan istifadəçilərin rekord sayda ziyarət etməsi nəticəsində serverin həddindən artıq yüklənməsi olduğu güman edilir.

Digər təyyarə izləmə xidməti “Plane Finder” Pelosinin marşrutunu uçuş monitorinqindən çıxarsa da, işini dayandırmayıb.

Bundan əvvəl bütün dünyada 300 000-dən çox insan “FlightRadar24” saytında ABŞ Nümayəndələr Palatasının spikeri Nensi Pelosinin təyyarəsini izləməyə qoşulmuşdu. Pelosinin təyyarəsinə diqqətin artması onunla bağlıdır ki, mətbuatda yayılan məlumatlara görə, spiker bu gün Çinin öz ərazisinin bir hissəsi hesab etdiyi, lakin faktiki müstəqil dövlət olan Tayvana səfərə hazırlaşır. Siyasətçinin planları Pekində son dərəcə mənfi qarşılanıb və onun Taypeyə səfəri halında sərt reaksiya vəd edilib.

Akqabay