Musiqisi ilə şeytanları qovan saksafonçu əcələ təslim oldu

Avropanın ən nüfuzlu caz musiqiçilərindən biri, saksofon ifaçısı Piter Brötsmann 82 yaşında vəfat edib. ABŞ-ın keçmiş prezidenti Bill Klinton onu "yaşayan ən böyük musiqiçilərdən biri" adlandırıb.

Publika.az xəbər verir ki, bu barədə Eremite Records-un icraçı direktoru Maykl Elers məlumat yayıb. Musiqiçinin əsərləri Almaniya tarixində bir növ "şeytanları qovmaq" üçün fəryad kimi qiymətləndirilib. Sənətçinin ölüm səbəbi açıqlanmayıb.

Musiqiçi öz tərzini xüsusilə 2-ci Dünya Müharibəsi dövründə insanlığa qarşı işlənən cinayətlərlə əlaqədar iblisləri qovmağın bir yolu olaraq ifadə edirdi.

Piter Brötsmann “The Wire”a verdiyi açıqlamada bu ifadələri işlətmişdi: “Gənclər başa düşmürlər ancaq Almaniyada başımıza gələnlər bizim nəslin travması idi. Orada böyük bir utanc və qorxunc bir travma var. Bəlkə də elə ona görə bu tip musiqiləri alman üslubu ilə ifa etmək Avropanın digər bölgələrindəki musiqilərdən fərqli gəlir. Çünki bu daha çox bir qışqırıqdır, daha çox vəhşi, daha aqressivdir.”

O, ilk əsərlərinin bir çoxunda ingilis saksofon ifaçısı Evan Parker ilə işləyib.

Parker onun haqqında danışarkən bu sözləri demişdi:

"Bir saksafondan bundan daha artığını əldə etməyin mümkün olduğunu düşünmürəm. O, bəzən saksafona çox sərt üfürdüyü üçün burnu qanayardı. Sənətinə hər şeyini qurban verdi.”

Nəzrin