Ərdoğanın qəhvə masasındakı kitablar diqqət çəkdi: Onlar nədən bəhs edir?

Prezident Ərdoğanın Litvanın paytaxtı Vilnüsdə keçirilən NATO Sammitində sıx diplomatik gediş-gəlişləri davam edir. Dünən görüşlər keçirən Ərdoğanın yanındakı qəhvə masasının üstündəki 4 kitab diqqət çəkib.

Publika.az xəbər verir ki, türk bayrağı olan qara qutu içindəki kitablar maraq obyektinə çevrilib. Kitablarının adlarının Türkiyənin Terrorla Mübarizə, Humanitar Yardımda Türkiyə Modeli, Liderlik Diplomatiyası, Türkiyənin NATO-ya üzvlük imkanları və çağırışları olduğu iddia edilib. Kitabların Rabitə İdarəsi tərəfindən NATO Sammiti üçün xüsusi olaraq hazırlandığı da iddialar arasındadır.

Prezident Ərdoğan Litvada keçirilən NATO Dövlət və Hökumət Başçıları Zirvəsi çərçivəsində Yunanıstanın Baş naziri Miçotakis ilə görüşüb. Türkiyə Prezidenti Litvada Niderlandın baş naziri Rutte ilə, səhər saatlarında isə İspaniyanın baş naziri Pedro Sançeslə görüşüb.

Nümayəndə heyətlərinin də iştirak etdiyi görüşdə Ərdoğanı xarici işlər naziri Hakan Fidan, MİT rəhbəri İbrahim Kalın, Prezidentin kommunikasiyalar üzrə direktoru Fahrettin Altun və Prezidentin baş müşaviri səfir Akif Çağatay Kılıç müşayiət edib. Məlumata görə, dünən Prezident Ərdoğanın diplomatiya trafiki sıx olub. Sessiyadan sonra ikitərəfli danışıqlara başlayan prezident Ərdoğan ilk olaraq LITEXPO Sərgi Mərkəzində Fransa Prezidenti Emmanuel Makronla görüşüb. Ərdoğan Makrondan sonra İngiltərə baş naziri Rişi Sunak, Kanada baş naziri Castin Trüdo, Almaniya kansleri Olaf Şolts və İtaliyanın baş naziri Giorgia Meloni ilə də görüşüb.

Görüşlərdə ikitərəfli əlaqələr, terrorla mübarizədə əməkdaşlıq, Türkiyənin Aİ-yə üzvlük prosesi və İsveçin NATO-ya üzvlük prosesi müzakirə edilib. Prezident Ərdoğan İtaliyanın baş naziri Meloni ilə görüşdükdən sonra ABŞ prezidenti Co Baydenlə görüşüb.

Görüşün əvvəlində prezident Ərdoğan Baydenə yenidən prezident seçilməsi münasibətilə təbrik mesajına görə təşəkkür edib və bildirib: “İnanıram ki, artıq strateji mexanizm çərçivəsində dövlət başçıları səviyyəsində məsləhətləşmələrin vaxtı çatıb. Bu gün NATO kənarındakı bu görüşü bunun ilk addımı kimi görürəm. Əvvəlki görüşlərimiz demək olar ki, istiləşməkdədir. Biz indi yeni bir prosesə başlayırıq. Təbii ki, bu yeni proses mənim üçün beş illik bir prosesdir. İndi sizin də seçki hazırlıqlarınız var, bu seçki hazırlıqlarınızla əvvəlcədən sizə uğurlar arzulayıram”.

Nəzrin