Bu ayaqqabı fantastik qiymətə satışa çıxarıldı - Dəyərli edən nədir?

"Apple" loqosu olan bir cüt ayaqqabı "Sotheby's" hərrac evi tərəfindən 50 min dollardan başlayan qiymətə hərraca çıxarılıb.

Publika.az xəbər verir ki, 1990-cı illərdə şirkətin bəzi işçiləri üçün hazırladığı və bir konfransda payladığı bu ayaqqabılar indiyə qədər satışda olmayıb. Ağ ayaqqabıların üzərində göy qurşağı rənglərində "Apple"-ın köhnə loqosu yer alır.

"Sotheby's" bu ayaqqabını "indiyə qədər görülən ən nadir məhsullardan biri" adlandırıb. Hərrac elanında "Omega" şirkətinin istehsal etdiyi 41 ölçülü dəri ayaqqabının qutusunda olduğunu və heç istifadə olunmadığı, ancaq dabanında bir qədər saralma olduğu bildirilib.

"Apple"-ın keçmişdə istehsal etdiyi və ya payladığı bu xatirə əşyalar illər ərzində böyük dəyər qazanıb. Pərəstişkarları şirkətin ən son texnologiyaları ilə olduğu kimi, keçmiş məhsulları ilə də maraqlanırlar. Bu yaxınlarda ilk açılmamış iphone seriyalarından biri də 190.000 dollardan çox qiymətə satıldı. "Apple"-ın ABŞ-ın Kaliforniya ştatındakı baş ofisində işçiləri üçün istehsal edilən "Apple Park" gödəkçələri də mövcuddur.

Nəzrin