Dünya

Maşınını düzgün park etməyən prezident cərimələndi – FOTO/VİDEO

17 Dekabr 2015 17:11

Polşa prezidenti avtomobilini qadağan olunmuş yerdə park etdiyi üçün cərimələnib.

Publika.az xarici mətbuata istinadən bildirir ki, polis prezident Anjey Dudanın qadağan olunmuş yerdə saxlanmış avtomobilinin təkərinə blok qoyub.

Məlumata görə, “Volkswagen”in ən ucuz modellərindən olan “Golf” markalı, qırmızı rəngli maşın prezidentin doğulub böyüdüyü Krakovda yerləşən iqamətgahının pəncərəsi önündə dayanıbmış və qonşuların məlumatı əsasında hadisə yerinə gələn polislər avtomobilin qadağan olunmuş yerdə saxlandığını bildirərək təkərini bağlayıblar.

Xəbər ildırım sürətilə bütün şəhərə yayılıb və Krakov sakinləri prezident maşınının yanında şəkil çəkdirməyə tələsiblər.

Məlum olub ki, həmin avtomobil, doğrudan da, Anjey Dudanın adınadır, lakin onu ölkə başçısının qızı sürür.

Bu ilin avqustunda Polşa prezidenti seçilən 43 yaşlı Duda 100 zlot (təxminən 25 dollar) cərimə ödədikdən sonra polis maşının təkərinə vurduğu “qandal”ı açıb.

Murad