Ukraynada vəziyyət gərginləşdi - Rusiya ordusu Donbasa girdi

Ukraynanın Donbas hövzəsində vəziyyət yenidən gərginləşib.

Publika.az UNİAN agentliyinə istinadən xəbər verir ki, Donetsk vilayətinin Kominternovo kəndinə Rusiya silahlı qüvvələrinin motoatıcı bölüyü daxil olub.

Ukrayna Ali Radasının üzvü Dmitri Tımçukun rəhbəri olduğu “İnformasiya Müqaviməti” hərbi tədqiqatlar mərkəzinin məlumatına görə, atəşkəs rejiminə baxmayaraq, Rusiya qoşunları Donbas hövzəsində yeni ərazilərin tutulmasını davam etdirir.

“Rusiya Kominternovo zonasına əlavə gücləri tullayaraq və yeni mühəndislik avadanlığı quraraq hərbi mövcudluğunu genişləndirirlər. Novoazovsk istiqamətinə hərbi texnikanın 6 vahidi, Lüksemburq və Poroxnya rayonlarına isə 3 tank, 2 MT-LB, 4 BTR-80 və 1 BRDM-2 irəliləyir. Onlar “könüllülər” deyil, Rusiya ordusunun nizami qoşun hissələridir”, - mərkəzin məlumatında deyilir.

Son məlumata görə, Kominternovo kəndini tutan döyüşçülər texnikanı yaşayış məntəqəsindən uzaqlaşdırıblar. Bunu “Facebook” səhifəsində daxili işlər naziri Arsen Avakov bildirib. Onun sözlərinə görə, bu addım bölgəyə ATƏT müşahidəçilərinin getməsi ilə bağlıdır.

Ömər Dağlı