Rusiyadan İrana "S-300" zərbəsi

Rusiya ən böyük müttəfiqi olan İrana satacağı S-300 zenit-raket sistemini İsrailin xəbərdarlıqlarından sonra göndərməkdən imtina edib.

Publika.az xəbər verir ki, bu barədə Küveytin “Əl-Ceridə” qəzeti bildirib.

Nəşrin iddiasına görə, Rusiya prezidenti Vladimir Putin "S-300"-lərin İrana çatdırılması barədə qərarı ləğv edib. Bildirilir ki, Rusiya imtinanı Tehranın “Hizbullah”a silah verməsi ilə əlaqələndirib.

Xatırladaq ki, Rusiya prezidentinin mətbuat katibi Dmitri Peskov fevralın 18-də İrana "S-300" zenit-raket sistemlərinin çatdırılmasının dəqiq vaxtının müəyyən edilmədiyini bildirmişdi.

Onun sözlərinə görə, buna səbəb ödənişdə problemlərin olmasıdır: “Zenit-raket sistemlərinin çatdırılmasının dəqiq vaxtı hələlik müəyyən olunmayıb. Hələlik sazişə uyğun şəkildə ödəniş edilməyib. Buna görə də konkret vaxtdan danışmaq tezdir”.

2015-ci ilin dekabrında bildirilirdi ki, İrana "S-300"PMU-2 sistemlərinin ilk alayının çatdırılması 2016-cı ilin yanvarında başlanacaq. Sistemin ikinci alayının avqust-sentyabr aylarında çatdırılması planlaşdırılırdı.

Qeyd edək ki, "S-300"-lərin satışı ilə bağlı razılaşma 2007-ci ildə imzalanıb. 2010-cu ilin sentyabr ayında Rusiyanın dövlət başçısı Dmitri Medvedev BMT Təhlükəsizlik Şurasının sanksiyalarına uyğun olaraq razılaşmasının icrasını təxirə salıb. 2015-ci ilin aprel ayında - İranın nüvə proqramı ilə bağlı ilkin razılaşma əldə olunduqdan sonra Rusiya prezidenti Vladimir Putin "S-300"-lərin satışına icazə verən qərarı imzalayıb.

Ömər Dağlı