PKK-nın “kiçik Qəndili” yerlə-yeksan edildi

Türkiyə Silahlı qüvvələrinin qırıcıları Şimali İraqda PKK düşərgələri və Lice çölündə müəyyən edilən nöqtələrə hava zərbələri endirib.

Publika.az Türkiyə mediasına istinadən xəbər verir ki, bu barədə Baş qərargahdan bildirilib.

Dünən həyata keçirilən hava əməliyyatının gedişatında İraqın şimalındakı Sinat-Haftanin və Matina bölgələrindəki beş hədəf vurulub. Terrorçuların içində olduğu sığınacaqlar və koordinasiya nöqtəsi məhv edilib.

Bundan başqa, Lice çölündə PKK-nın yeri əvvəlcədən müəyyən edilən hədəfi vurulub. Terrorçuların da içində olduğu sığınacaq məhv edilib.

Licedəki əməliyyatda təşkilatın “kiçik Qəndili” hesab olunan Şenyayla bölgəsinə də hava zərbələri endirilib. Əməliyyatın gedişatında 20 hədəf vurularaq terror təşkilatına ağır zərbə vurulub.

Türkiyə mediasının yazdığına görə, PKK terror təşkilatı Türkiyənin cənubi-şərqində Bingöl vilayəti, Diyarbəkir vilayətinin Lice və Diyarbəkir vilayətinin Kulp mahalı üçbucağında yerləşən Şenyayla bölgəsində “Türkiyə Qəndili”ni yaratmağa hazırlaşır. Kəşfiyyat hesabatlarına görə, ərazinin çox hissəsi dağlıq olan Şenyaylada “Şenyayla Gücü”, “Dorsin Gücü” və “Lice Gücü” olmaqla üç düşərgə var. Onların hər birində 25-35 nəfər təlim keçir. Kəşfiyyat hesabatlarına görə, bu düşərgələrdə snayperlər və bomba mütəxəssisləri yer alıb.

Qeyd edilir ki, böyük şəhərlərdə həyata keçirilən terror aktları məhz bu üç düşərgə tərəfindən hazırlanır.

Ömər Dağlı