“Leşyeyən qartal”, “Quduz it”, yaxud “rahib döyüşçü” – Trampın “YAXŞI UŞAQLARI”

“Amerikanı yenidən böyük edəcəyik” vədi ilə seçkini qazanan Donald Tramp öz administrasiyasını şəxsən formalaşdırır.

Publika.az xəbər verir ki, onun komandasında gözlənilməyən və müxtəlif sahələrdə uğur qazanmış şəxslər yer alır. Sanki özü kimi qeyri-adi insanları ətrafına toplayır. Və o, öz namizədlərini “yaxşı uşaqlar” adlandırır.

ABŞ-ı idarə edəcək administrasiyada kimlər var?

Stiven Bennon: Trampın baş məsləhətçisi olacaq. O, Ultrasağçı “Breitbart News” nəşrinin keçmiş sahibidir. Harvard Universitetindən məzun olub, bir müddət “Goldman Sachs” şirkətində çalışıb. Daha sonra sənədli filmlərin çəkilişi ilə məşğul olub. Onun sənədli filmlərində əsasən müasir iuda-xristian sivilizasiyasının Çin və Rusiyanın “fırıldaq kapitalizmi”, “yırtıcı liberal kapitalizm” və “radikal islam faşizmi”nin hücumlarına məruz qaldığı əks olunur.

Bannonun fikrincə, Fransada sağ “Milli Cəbhə” partiyasının, Britaniyada sağçı UKİP-in və digər radikal sağların ayağa qalxması haqlıdır. Tənqidçilər onu “Breitbart News” saytında nasistlərə, antisemitlərə və radikal sağ fəallarına yer verməkdə ittiham edirdilər. Böyük məsləhətçi isə iddia edirdi ki, onun saytı yalnız “alternativ sağlar” üçün platformadır.

Bennon yeni administrasiyanın “boz kardinalı” olacaqsa, bu, radikal siyasətin yürüdülməsi ilə nəticələnə bilər.

Rayns Pribus: Ağ Ev heyətinin rəhbəri postuna namizəddir. Milli Respublika Komitəsinin sədridir. Mühafizəkarlar onu seçki kampaniyası dövründə partiyanı parçalamadığına görə tərifləyirlər. Çünki Pribus martda açıqlamışdı ki, o, müstəqil kampaniya keçirərək, öz namizədliyini irəli sürə bilər. Lakin o, buna getmədi və Trampa dəstək verdi.

Reks Tillerson: ABŞ-ın yeni dövlət katibi postuna namizəd. O, karyerasında sadə mühəndislikdən “ExxonMobil” şirkətinin rəhbəri vəzifəsinə qədər addımlayıb. Rusiyanın “Rosneft” şirkəti ilə aktiv əməkdaşlığına görə də tanınır. Bir sıra layihələrdə Vladimir Putinlə birbaşa danışıqlar aparıb. Rusiyanın “Dostluq” ordeni ilə təltif olunub. Tillerson Rusiyaya qarşı sanksiyaları qəbul etmir. Onun namizədliyinin Senatdan keçəcəyi hələki şübhə altındadır. Xüsusilə Con Makkeyn və Marko Rubio kimi respublikaçı senatorlar Tillersonun “Rusiya ilə əlaqələrindən” narahatdırlar.

General Ceyms Mettis: 40 il ərzində dəniz piyadası qoşununda xidmət edib. “Quduz it” və “rahib döyüşçü” ləqəbi ilə məşhurdur. Mettis 2013-cü ilə qədər ABŞ Silahlı Qüvvələrinin Mərkəzi Komandanlığına rəhbərlik edirdi. Lakin sonradan İranla bağlı əmrə sərt reaksiya verdiyi üçün Obamanın “gözündən düşdü”. O, Pentaqonun rəhbəri postuna namizəd göstərilir.

Maykl Flinn: ABŞ hərbi kəşfiyyatının keçmiş direktorudur. O, vaxtından əvvəl öz postundan istefaya göndərilib. Zaman-zaman Obama administrasiyasını tənqid etməsi və radikal İslamla təcili mübarizəyə səsləyən fikirləri ilə gündəmə gəlib. Flinn sosial şəbəkələrdə Hillari Klinton və komandasının pedofildə ittiham olunması işində iştirak edib. Milli təhlükəsizlik üzrə müşavir postuna namizəddir.

Cef Seşns: Alabama ştatının senatorudur. Qeyri-qanuni miqrasiyanın qəti əleyhdarıdır və bu sahədə qanunvericiliyin sərtləşməsini istəyir. Hələ 1986-cı ildə Ronald Reyqanın dövründə onun Federal hakim postuna gətiriləcəyi deyilirdi. Lakin bu baş tutmadı. İddia edilirdi ki, Seşns prokurorun qaradərili köməkçisi haqqında zarafatla “zənci” deyib. O, həmçinin Ku-Kluks-Klanı (XIX əsrdə ABŞ-da qaradərilərə qarşı əsil soyqırımı törədən qrup) “yaxşı uşaqlar” hesab edir. ABŞ-ın Baş prokuroru postuna namizəddir.

Mayk Pompeo: Kanzas ştatının senatorudur. Radikal müsəlmanlara qarşı sərt ritorikası ilə məşhurdur. Mərkəzi Kəşfiyyat İdarəsinin əməkdaşları Pompeonu “qəhrəman” adlandırırlar. O, Quantanamo həbsxanasının bağlanmasına qarşıdır. Həmçinin, İranla nüvə proqramının ləğvini istəyir. Edvard Snoudeni satqın adlandırır və onun edam edilməsini tələb edir. Mərkəzi Kəşfiyyat İdarəsinin rəhbəri postuna namizəddir.

Con Kellin: 45 il dəniz piyada qoşununda xidmət edib. İstefada olan generaldır. Latın Amerikası və Karib adalarında ABŞ ordusunun fəaliyyətinə rəhbərlik edib, həmçinin, Quantanamo həbsxanasında işləyib. Federal Təhlükəsizlik Xidmətinin rəhbəri vəzifəsinə namizəddir.

Uilbir Ross: “Leşyeyən qartal”, yaxud “müflisliklər kralı” ləqəbi ilə məşhurdur. Milyarder-investor 1990-cı illərdə Rusiyanın müflisləşən müəssisələrini alaraq, onlardan maksimum xeyir götürməsi ilə tanınır. O, Obama amdinistrasiyasının ikitərəfli ticarət sazişlərinin bir çoxunu haqsız hesab edir və ABŞ üçün daha əlverişli şərtlər əldə etmək məqsədilə bu sazişlərə yenidən baxmağı tələb edir. Ticarət naziri vəzifəsinə namizəddir.

Stiven Mnaçin: Hollivud prodüseri olmuş Mnaçin Trampın seçki kampaniyasında maliyyə məsələlərini idarə edirdi. 2008-ci ildə maliyyə böhranı zamanı o, “İndyMac” bankını vəziyyətdən çıxarmağı bacardı. Mnaçin vergi islahatını prioritet hesab edir. Maliyyə naziri postuna namizəddir.

Nikki Heyli: Tramp administrasiyasında yer alacaq əsas xanımdır. Yeni administrasiyada ABŞ-ın BMT-dəki xüsusi nümayəndəsi postuna namizəd göstərilir. Lakin onun xarici siyasətdə praktiki təcrübəsi olmadığı üçün Senatdan keçə biləcəyi sual altındadır.

Skott Pryuitt: Oklahoma ştatının baş prokuroru olan Pryuitt qlobal istiləşməyə inanmayan, ətraf mühitin müdafiəsi agentliyinə qarşı çıxan şəxs olaraq məşhurdur. O, parnik qazlarının tullantılarının ixtisar edilməsi üzrə Obamanın planına qarşı çıxırdı. Tramp onu ətraf mühitin müdafiəsi üzrə agentliyin rəhbəri vəzifəsinə namizəd göstərir.

Asif Nərimanlı