Ermənistanın 80 faizi dağılacaq - Ekspertdən xəbərdarlıq

Türkiyədə qeydə alınmış gücdə zəlzələ baş verərsə, Ermənistanın binalarının 80%-i, o cümlədən yeni tikililər dağılacaq.

Publika.az xəbər verir ki, bunu müzakirə zamanı memar, Ermənistanın Daşınmaz Əmlak Kadastrı üzrə Dövlət Komitəsinin keçmiş rəhbəri Sərhat Petrosyan deyib.

O deyib ki, bu gün tikinti məcəllələrinə görə icazə verilən mərtəbələrin maksimum sayı 18-dir, lakin İrəvanda bu normanın, eləcə də seysmik normaların pozulması ilə tikilmiş 50-dən çox bina var.

Onun sözlərinə görə, hazırda İrəvanda 120 min mənzil tikilir ki, bu da şəhər əhalisinin 30%-ni qəbul edə bilir:

“Bu, Gümrü, Vanadzor və digər iri şəhərlərdəki mənzillərin sayı ilə eynidir. Eyni zamanda şəhərdə tıxaclar, ekoloji və digər məsələlərlə bağlı yeni problemlər yaranır. İpoteka ödənişləri üzrə gəlir vergisinin qaytarılması proqramı nəticəsində biz gələcəkdə Ermənistanın xarici borcunu daha 30% artıra bilərik”.

Petrosyan xatırladıb ki, müstəqil Ermənistanda sonuncu dəfə İrəvanın Baş Planı 2005-2006-cı illərdə hazırlanıb və bu, müasir tələblərə cavab vermir. O, əmin olduğunu bildirib ki, hazırda hazırlanmaqda olan paytaxtın yeni Baş Planı şəhər idarəetməsi sahəsində yanaşmaları nəzərə alsaq, aktual problemləri həll etməyəcək.

“Yenə boş yerə pul xərcləyib, beynəlxalq donorlardan vəsait cəlb etməyə xidmət edəcək, dövlət borcunu artıracaq, lakin uzunmüddətli problemləri həll etməyəcək bir sənəd alacağıq. “Ajapnyak” metrostansiyasının tikintisi layihəsi özlüyündə İrəvanın Baş Planına əsaslı şəkildə ziddir və nəqliyyat problemini həll etməyəcək”, - ekspert əlavə edib.

Aydan