Milanda ““Normandiya dördlüyü”nün liderləri görüşüb

“Normandiya dördlüyü”nün liderləri (Rusiya, Ukrayna, Almaniya və Fransa) İtaliyanın Milan şəhərində Ukrayna münaqişəsinin nizama salınması və Rusiya qazının Avropaya çatdırılması məsələlərini müzakirə edib.

Publika.az-ın RİA xəbər agentliyinə istinadən verdiyi məlumata görə, bu barədə Kremlin mətbuat xidməti bildirib.

Görüşdə Rusiya prezidenti Vladimir Putin, Ukrayna prezidenti Pyotr Poroşenko, Almaniya kansleri Angela Merkel və Fransa prezidenti Fransua Olland iştirak edib. Danışıqlara Rusiya nümayəndə heyətinin tərkibində həmçinin “Qazprom” şirkətinin rəhbəri Aleksey Miller və energetika naziri Aleksandr Novak olub.

Görüşlə bağlı Poroşenkonun mətbuat xidməti də açıqlama verib.

“Danışıqlarda təbii qaz razılaşmasının baza parametrləri uyğunlaşdırılıb. Bizdə qaz məsələsində müəyyən təmkinli irəliləyiş var. Sazişin əsas parametrləri haqqında razılaşdıq. İndi onun maliyyələşdirilməsi üçün lazımlı vasitələrin mənbələri haqqında danışıqlar gedir”, - mətbuat xidməti Poroşenkodan sitat gətirib.

Almaniya hökumətinin rəsmi nümayəndəsi Şteffen Zaybert də görüşdə Rusiya qazının Avropaya çatdırılması məsələsinə mövqelərini bir qədər yaxınlaşdırmağı bacardıqlarını deyib.

Almaniya hökumətinin nümayəndəsi həmçinin bildirib ki, tərəflər Ukrayna böhranını müzakirə edib və Minsk razılaşmasının həyata keçirilməsinin vacibliyini vurğulayıblar.

Ömər Dağlı