Dünya əhalisinin 1,1 milyardı yoxsulluq içində yaşayır

BMT-nin İnkişaf Proqramı (UNDP) və Britaniya Oksford Yoxsulluqla Mübarizə və İnsan İnkişafı Təşəbbüsünün (OPHI) ekspertləri dünya üzrə yoxsul insanların sayını qiymətləndiriblər.

Publika.az xəbər verir ki, araşdırma OPHI-nin rəsmi saytında dərc edilib.

Hesabata əsasən, qlobal əhalinin 1,1 milyardı yoxsulluq şəraitində yaşayır. Üstəlik, onların 40 %-i (455 milyon insan) müharibələr, qeyri-sabitlik və / və ya aşağı sülhsevərlik səviyyəsi ilə əhatə olunmuş ölkələrdə yaşayır.

“Biz münaqişədən təsirlənmiş bölgələrdə yoxsulluq səviyyəsinin xeyli yüksək olduğunu aşkar etdik. Müharibə vəziyyətində olan ölkələrdə hər üç nəfərdən biri yoxsuldur (34,8 %), halbuki Uppsala Münaqişə Məlumatları Proqramına görə, münaqişədən təsirlənməmiş ölkələrdə bu göstərici doqquz nəfərdən birdir (10,9 %)”, – hesabatın müəllifləri qeyd ediblər.

Alimlər əlavə ediblər ki, 1,1 milyard yoxsul insanın yarısından çoxu 18 yaşadək uşaqlardır (584 milyon insan).

Bundan başqa, yoxsulların əksəriyyəti sanitariya şəraitindən (828 milyon insan), mənzildən (886 milyon insan) və ya yemək bişirmək üçün yanacaqdan (998 milyon insan) məhrumdur.