Dünya

Putin üçün daha bir sübut: Donbasda 41 rusiyalı tutuldu

27 Yanvar 2015 13:51

Ukrayna Təhlükəsizlik Xidməti Rusiyanın Donbas hövzəsində döyüşən 41 vətəndaşını saxlayıb.

Publika.az-ın Ukrayna mediasına istinadən verdiyi məlumata görə, bu barədə Təhlükəsizlik Xidmətinin rəhbəri Valentin Nalivayçenko deyib.

Saxlanılan şəxslər məhkəmə qarşısına çıxarılacaq. Qeyd olunur ki, Rusiya vətəndaşlarından 10-u axtarışda olub.

Bundan əvvəl isə Ukrayna prezidentinin müşaviri Yuri Biryukov Donbas hövsəzində Rusiya qoşunlarının olduğunu sübut edən fotolar təqdim edib. Xüsusilə, Rusiya vətəndaşına məxsus hərbi biletin Donetsk hava limanı yaxınlığında tapıldığı bildirilir.

Qeyd edək ki, Ukrayna və Qərb Rusiyanı Donbas hövzəsindəki separatçıları dəstəkləməkdə ittiham edir. Moskva ittihamları rədd edir və Ukrayna ordusuna qarşı vuruşanların “könüllü” olduğunu bildirir.

Ömər Dağlı