Dünya

Con Kerri qar təmizləmədiyinə görə cərimə olundu

31 Yanvar 2015 01:10

Yanvarın 29-da Boston şəhərinin rəhbərliyi ABŞ-ın dövlət katibi Con Kerrini evinin yaxınlığında qarın təmizlənməməsi səbəbi ilə cərimələyib.

Son günlər Boston şəhəri güclü qar fırtınasının təsirinə məruz qalıb. Şəhərdə 500 millimetrə qədər yağıntı düşüb. Bununla əlaqədar şəhərin meri Martin Uloş evinin yaxınlığındakı qarı təmizləməyən hər kəsə cərimə yazılacağını deyib. Şəhərin mərkəzinə yaxın, qiyməti 11,5 milyon dollardan baha olan 1899-cu ilə aid beşmərtəbəli kərpic imarətin sahibi Con Kerri də cərimə olunanların arasındadır.

Con Kerrinin qar fırtınası baş verən zaman, yanvarın 23-də vəfat edən kral Abdullah bin Əbdüləziz Al-Səudun dəfni ilə əlaqədar Səudiyyə Ərəbistanında səfərdə olduğunu deyən ABŞ dövlət katibinin rəsmi nümayəndəsi onun yaxın zamanda cəriməni ödəyəcəyini bildirib.